കോഴിക്കോട്: ലോകകപ്പ് ഫുട്‌ബോള്‍ വിജയികളെ പ്രവചിച്ച് മജീഷ്യന്‍ രാജീവ് മേമുണ്ട. ലോകകപ്പ് ഫുട്‌ബോള്‍ ഫൈനലില്‍ എത്തുന്ന രാജ്യങ്ങള്‍, വിജയികളാകുന്ന രാജ്യം, ടോപ് സ്‌കോറര്‍, വിജയികള്‍ അടിക്കുന്ന ഗോളുകളുടെ എണ്ണം എന്നിവയാണ് രാജീവ് മേമുണ്ട പ്രവചിച്ചത്. കാലിക്കറ്റ് പ്രസ് ക്ലബിന്റെ സഹകരണത്തോടെ പ്രസ്‌ക്ലബ് മലപ്പുറം പി. മൂസ്സ ഹാളില്‍ മാധ്യമ പ്രവര്‍ത്തകരുടെ സാന്നിധ്യത്തിലായിരുന്നു പ്രവചനം. സൗത്ത് ഇന്ത്യന്‍ ബാങ്ക് ഡെപ്യൂട്ടി ജനറല്‍ മാനേജര്‍ ജോബി, എല്‍.ഐ.സി ഹെല്‍ത്ത് മാനേജര്‍ പ്രേംകുമാര്‍, ആര്‍ക്കിടെക്ട് ജയന്‍ ബിലാത്തിക്കുളം, മംഗളം ഫോട്ടോഗ്രാഫര്‍ രാജേഷ് മേനോന്‍ എന്നിവര്‍ ഒപ്പിട്ട ലെറ്റര്‍ പാഡില്‍ ലോകകപ്പ് ഫുട്‌ബോള്‍ വിജയികള്‍ ഉള്‍പ്പെടെ നാലു പ്രവചനങ്ങളും എഴുതി വിവിധ പെട്ടിയിലാക്കി പൂട്ടുകയായിരുന്നു. പെട്ടി സൗത്ത് ഇന്ത്യന്‍ ബാങ്കിലെ ലോക്കറില്‍ സൂക്ഷിക്കാന്‍ ഏല്‍പ്പിച്ചു. പെട്ടിയുടെ താക്കോല്‍ മാധ്യമ പ്രവര്‍ത്തകനായ രാജേഷ് മേനോനെ രാജീവ് ഏല്‍പ്പിച്ചു. ഫൈനല്‍ മത്സരം കഴിഞ്ഞ് 16ന് പ്രസ്‌ക്ലബില്‍വച്ച് പെട്ടിതുറന്ന് ഫലപ്രവചനം കൃത്യമാണോയെന്ന് പരിശോധിക്കും. നേരത്തെ തിരഞ്ഞെടുപ്പ് ഫലം പ്രവചിച്ച് ശ്രദ്ധേയനായ മാന്ത്രികന്‍ കൂടിയാണ് രാജീവ്. മാന്ത്രിക പ്രതിഭ പുരസ്‌ക്കാരത്തിനും അര്‍ഹനായിട്ടുണ്ട്.