ഹൈദരാബാദ്: ഐ.പി.എല്ലിലെ ഇന്നത്തെ രണ്ടാമത്തെ ആവേശപ്പോരാട്ടത്തില്‍ ശക്തരായ ഹൈദരാബാദ് മുംബൈ ഇന്ത്യന്‍സിനെ നേരിടും. സീസണില്‍ മികച്ച ഫോമില്‍ കളിക്കുന്ന സണ്‍ റൈസേഴ്‌സിനെ പിടിച്ചുകെട്ടാന്‍ മുംബൈക്ക് ഒരുപാട് വിയര്‍പ്പൊഴുക്കേണ്ടി വരും. കൊല്‍ക്കത്തയോടേറ്റ ആദ്യമത്സരത്തിലെ പരാജയത്തിനു ശേഷം അതി ശക്തമായ തിരിച്ചു വരവാണ് സണ്‍ റൈസേഴ്‌സ് നടത്തിയത്. ബാറ്റിങ്ങും ബാളിങ്ങും ഒരു പോലെ സന്തുലിതം.
പന്തു ചുരണ്ടല്‍ വിവാദത്തിനു ശേഷം ക്രീസിലേക്ക് മടങ്ങിയെത്തിയ വാര്‍ണറും ഇംഗ്ലീഷ് താരം ബൈറിസ്‌റ്റോയും മികച്ച ഫോമിലാണ്. ഓറഞ്ച് ക്യാപ് മത്സരത്തില്‍ ആദ്യ രണ്ടു സ്ഥാനങ്ങളില്‍ ഇരുവരും ഇടംപിടിച്ചതില്‍ നിന്നുതന്നെ മനസിലാക്കാം ഹൈദരാബാദിന്റെ ശക്തി. ഈ സീസണില്‍ ഓരോ വീതം സെഞ്ചുറിയും ഇരുവരുടെയും പേരില്‍ കുറിക്കപ്പെട്ടു.ഡല്‍ഹിക്കെതിരെയുള്ള മത്സരമൊഴിച്ചാല്‍ മറ്റുള്ള എല്ലാ മത്സരങ്ങളിലും 50നു മുകളില്‍ വാര്‍ണര്‍ സ്‌കോര്‍ ചെയ്തിട്ടുണ്ട്. ബൗളിങ്ങിലും സണ്‌റൈസേഴ്‌സിന് ആശങ്കകളില്ല. കഴിഞ്ഞ മത്സരത്തില്‍ ഡല്‍ഹിയെ 129ല്‍ ഒതുക്കിയ അതേ ബൗളിങ് നിര ഒരിക്കല്‍ കൂടി തിളങ്ങുമെന്ന പ്രതീക്ഷയിലാണ് സണ്‍റൈസേഴ്‌സ്.
വമ്പന്‍ അടിക്ക് പേരു കേട്ട കോഹ്‌ലിപ്പടയെ പോലും ഒതുക്കിയ മുഹമ്മദ് നബിയെയും റാഷിദ്ഖാനെയും ഭുവനേശ്വര്‍ കുമാറിനെയും മുംബൈ പേടിക്കുക തന്നെ ചെയ്യണം.