നിലമ്പൂര്‍: ആദായനികുതി വകുപ്പു നടപ്പു സാമ്പത്തിക വര്‍ഷം നിലവില്‍ വരുത്തിയിട്ടുള്ള ഇന്‍കം ഡിക്ലറേഷന്‍ സ്‌കീം 2016 സംബന്ധിച്ച് വിശദീകരണ യോഗം നിലമ്പൂരില്‍ ചേര്‍ന്നു. വ്യാപാര ഭവനില്‍ തിരൂര്‍ റെയ്ഞ്ച് ആദായ നികുതി ജോയിന്റ് കമ്മീഷണര്‍ കെ.എം അശോക് കുമാര്‍ പദ്ധതി വിശദീകരിച്ചു. കഴിഞ്ഞ സാമ്പത്തിക വര്‍ഷത്തേയോ മുന്‍ വര്‍ഷങ്ങളിലേയോ വരുമാനമോ ആസ്തിയോ വിവരങ്ങളോ ആദായനികുതി വകുപ്പ് മുമ്പാകെ സമര്‍പ്പിക്കാന്‍ വിട്ടു പോയിട്ടുണ്ടെങ്കില്‍ സെപറ്റംബര്‍ 30 നകം സമര്‍പ്പിക്കാനുള്ള അവസരം ഈ പദ്ധതിയിലൂടെ ലഭിക്കും.
ഡിക്ലറേഷനുകള്‍ ഓണ്‍ലൈനായും പേപ്പര്‍ ഫോം ആയും സമര്‍പ്പിക്കാവുന്നതാണ്. പേപ്പര്‍ ഫോം കോഴിക്കോട് ആദായനികുതി പ്രിന്‍സിപ്പല്‍ കമ്മീഷണര്‍ മുമ്പാകെയാണ് സമര്‍പ്പിക്കേണ്ടത്. യോഗത്തില്‍ ചാര്‍ട്ടേര്‍ഡ് അക്കൗണ്ടന്റുമാര്‍, ടാക്‌സ് പ്രാക്ടീഷണര്‍മാര്‍, വ്യാപാരികള്‍ തുടങ്ങിയവര്‍ പങ്കെടുത്തു. ആദായ നികുതി ഓഫീസര്‍മാരായ നാരായണന്‍, മോഹന്‍ ദാസ് തുടങ്ങിയവരും പ്രസംഗിച്ചു.