കൊണ്ടോട്ടി: കേരളത്തിലെ വിമാനത്താവളങ്ങള്‍ വഴിയുള്ള കോടികളുടെ സ്വര്‍ണക്കടത്ത് പിടിക്കപ്പെടുമ്പോഴും തുടര്‍ അന്വേഷണം എങ്ങുമെത്താറില്ല.  ജീവിത പ്രാരാബ്ധങ്ങളില്‍ കുടുങ്ങുന്ന പ്രവാസികളെ കാരിയര്‍മാരാക്കി സ്വര്‍ണം വിമാനത്താവളങ്ങള്‍ വഴി കടത്തുമ്പോള്‍, തനിക്ക് സ്വര്‍ണം നല്‍കിയ മാഫിയയെക്കുറിച്ചോ ആര്‍ക്കാണ് സ്വര്‍ണം എത്തിച്ച് നല്‍കുന്നതെന്നോ ഇതുവരെ പിടിക്കപ്പെട്ട ഒരാള്‍ക്കും മൊഴി നല്‍കാനായിട്ടില്ല. 

കള്ളക്കടത്തിന്റെ സൂത്രധാരന്മാര്‍ മുഴുവന്‍ ഇടനിലക്കാരെ ഉപയോഗപ്പെടുത്തിയാണ്  പദ്ധതികള്‍ ആസൂത്രണം ചെയ്യുന്നത്. അതുകൊണ്ടുതന്നെ സ്വര്‍ണം കൊണ്ടുവരുന്ന കാരിയറെ ചോദ്യം ചെയ്യുമ്പോഴെല്ലാം അന്വേഷണ സംഘത്തിന് എത്തിച്ചേരാനാകുന്നത് ഏതെങ്കിലും വ്യക്തികളിലായിരിക്കും. ഇതോടെ അന്വേഷവും വഴിമുട്ടും.

   ദുബൈ കേന്ദ്രീകരിച്ചാണ് കേരളത്തിലേക്കുള്ള പ്രധാന സ്വര്‍ണക്കടത്ത്. എന്നാല്‍ ഇവരിലേക്ക് അന്വേഷണം ഒരിക്കലും എത്താറില്ല. വിമാനത്താവളങ്ങളില്‍ ഒരു കോടിക്ക് മുകളിലുള്ള സ്വര്‍ണം  ഒരു യാത്രക്കാരനില്‍ നിന്ന് പിടിക്കപ്പെട്ടാല്‍ മാത്രമാണ് നിലവില്‍ കേസ് ചാര്‍ജ് ചെയ്യുന്നത്. ഒരു കോടിക്ക് താഴെയുള്ളവ പിടിച്ചാല്‍  കസ്റ്റംസ് നിശ്ചയിക്കുന്ന നികുതിയും പിഴയും നല്‍കി കൊണ്ടുവന്ന യാത്രക്കാരന് തന്നെ തിരിച്ചെടുക്കാനാകും. ഇത്തരത്തിലുള്ള പഴുതുകള്‍ കാരണമാണ് കള്ളക്കടത്തിലേക്ക് കൂടുതല്‍ പേര്‍ ആകൃഷ്ടരാകുന്നതെന്നും ചൂണ്ടിക്കാണിക്കപ്പെടുന്നു.