തിരുവനന്തപുരം: കഴിഞ്ഞ വര്‍ഷം കേരളത്തിലെ വിമാനത്താവളങ്ങളില്‍ അനധികൃതമായി കടത്തിക്കൊണ്ടുവന്നതിന് പിടികൂടിയത് 400 കിലോയോളം സ്വര്‍ണം. കോഴിക്കോട് വിമാനത്താവളത്തിലാണ് കഴിഞ്ഞ വര്‍ഷം ഏറ്റവും കൂടുതല്‍ കള്ളക്കടത്ത് സ്വര്‍ണം പിടികൂടയതെന്നും വിവരാവകാശ നിയമത്തിന്റെ അടിസ്ഥാനത്തില്‍ കസ്റ്റംസ് നല്‍കിയ മറുപടിയില്‍ പറയുന്നു. 

2019ല്‍ തിരുവനന്തപുരം വിമാനത്താവളത്തില്‍ 63 കിലോയുടെ കള്ളക്കടത്ത് സ്വര്‍ണമാണ് പിടികൂടിയത്. കോഴിക്കോട് വിമാനത്താവളില്‍നിന്നു 233 കിലോയുടെ സ്വര്‍ണം പിടികൂടിയിരുന്നു. കൊച്ചി വിമാനത്താവളത്തില്‍നിന്നു 115 കിലോ പിടികൂടിയപ്പോള്‍ കണ്ണൂരില്‍ 33 കിലോയും പിടിച്ചെടുത്തു. 2018ല്‍ കോഴിക്കോട് 176ഉം തിരുവനന്തപുരത്ത് 41ഉം കണ്ണൂരില്‍ മൂന്നു കിലോയുടെ സ്വര്‍ണവും പിടിച്ചെടുത്തു. 2017ല്‍ ഇത് കോഴിക്കോട് 79ഉം തിരുവനന്തപുരത്ത് 10 കിലോ സ്വര്‍ണവുമായിരുന്നു. വര്‍ഷം തോറും സ്വര്‍ണക്കടത്ത് വന്‍ തോതില്‍ വര്‍ധിച്ചുവരുന്നതിന്റെ തെളിവാണ് പിടിക്കപ്പെടുന്ന സ്വര്‍ണത്തിന്റെ ഈ കണക്കുകള്‍.