കൊച്ചി: മഹാരാജാസ് കോളജ് ക്യാംപസിലേക്ക് ഇന്നലെ നവാഗതരെത്തി. പക്ഷേ പതിവുകാഴ്ചയില്‍ നിന്നും വ്യത്യസ്തമായി കൊടിതോരണങ്ങളോ ആരവങ്ങളോ ഇല്ലാത്ത ക്യാംപസിലേക്കാണ് അവര്‍ നടന്നുകയറിയത്. അവര്‍ക്ക് സ്വാഗതമോതുന്നതിനുള്ള ഒരുക്കങ്ങള്‍ക്കിടെ വിടപറഞ്ഞ അഭിമന്യുവിന്റെ ഓര്‍മകള്‍ക്കിടയിലൂടെ...
കഴിഞ്ഞ തിങ്കളാഴ്ച പുലര്‍ച്ചെയാണ് നവാഗതര്‍ക്ക് സ്വാഗതമോതാനുള്ള ഒരുക്കങ്ങള്‍ക്കിടെ ഉണ്ടായ സംഘര്‍ഷത്തിനൊടുവില്‍ അഭിമന്യു എന്ന വിദ്യാര്‍ഥി നേതാവ് കൊല്ലപ്പെട്ടത്. ഇതേത്തുടര്‍ന്ന് കോളജിലെ പുതിയ വിദ്യാര്‍ഥികളുടെ പ്രവേശനം നീട്ടിവയ്ക്കുകയായിരുന്നു. അതനുസരിച്ച് ഇന്നലെയാണ് മഹാരാജാസ് കോളജിലേക്ക് പുതിയ വിദ്യാര്‍ഥികള്‍ എത്തിയത്. വിദ്യാര്‍ഥി സംഘടനകള്‍ മത്സരിച്ചാണ് സ്വാഗതമോതിക്കൊണ്ട് ബാനറുകളും കൊടിതോരണങ്ങളും ഒരുക്കാറുണ്ടായിരുന്നത്. ഈ മത്സരമാണ് കഴിഞ്ഞ ആഴ്ച അഭിമന്യുവിന്റെ ജീവനെടുക്കാന്‍ കാരണമായതും. എന്നാല്‍ ഇന്നലെ കവാടത്തില്‍ ഉണ്ടായിരുന്നത് രാവിലെ മുതല്‍ തോരാതെ പെയ്യുന്ന മഴയില്‍ നനഞ്ഞു കുതിര്‍ന്ന ഏതാനും കൊടികള്‍ മാത്രം. പുതിയ കൂട്ടുകാരെ വരവേല്‍ക്കാന്‍ കോളേജ് ഗേറ്റില്‍ ആരും തമ്പടിച്ചതുമില്ല. ആരവങ്ങളില്ലാതെ നനഞ്ഞൊട്ടിയ കോളേജ് ഗ്രൗണ്ടിലേക്ക് നവാഗതരും നിലവിലുള്ളതുമായ വിദ്യാര്‍ഥത്ഥികള്‍ നിശബ്ദരായാണ് എത്തിയത്.
മഹാരാജാസിന്റെ ചരിത്രത്തില്‍ തന്നെ ഏറ്റവും ശോക പൂര്‍ണമായ നവാഗത പ്രവേശനം ആയിരുന്നു ഇന്നലത്തേത്. നിനച്ചിരിക്കാതെ കൊലക്കത്തിക്ക് ഇരയായി അഭിമന്യു ഈ ലോകത്തോട് വിടവാങ്ങി ഒരാഴ്ച കഴിഞ്ഞിട്ടും വിദ്യാര്‍ഥികളുടെ മനസ്സ് ശാന്തമായിട്ടില്ല. തങ്ങളുടെ പ്രിയ സുഹൃത്തിന്റെ ഓര്‍മ്മയിലാണ് ഓരോ വിദ്യാര്‍ഥത്ഥിയും കളിചിരി മറന്ന കാമ്പസിലൂടെ നടന്നുപോയത്. ദു:ഖം തിങ്ങിയ മുഖവുമായാണ് അധ്യാപകര്‍ ക്ലാസുകളിലേക്ക് എത്തിയതും.
വിദ്യാര്‍ഥികളും അധ്യാപകരും ചേര്‍ന്ന് അഭിമന്യുവിന്റെ കുടുംബത്തെ സഹായിക്കാന്‍ കൈകോര്‍ത്തതിനെ തുടര്‍ന്ന് സമാഹരിച്ച അഞ്ച് ലക്ഷം രൂപ പ്രിന്‍സിപ്പലും അധ്യാപകരും ചേര്‍ന്ന് ഇന്ന് വട്ടവടയിലെ അഭിമന്യുവിന്റെ വീട്ടിലെത്തിക്കും. അതുകൊണ്ടും തങ്ങളുടെ കടമ കഴിഞ്ഞില്ല എന്ന തിരിച്ചറിവിലാണ് ഓരോ വിദ്യാര്‍ഥിയും. മഹാരാജാസ് അതിന്റെ പഴയ കളിച്ചിരിയിലേക്കും ആരവങ്ങളിലേക്കും തിരിച്ചെത്തണമെങ്കില്‍ ഇനിയുമേറെക്കാലം കാത്തിരിക്കേണ്ടിവരുമെന്ന് ഉറപ്പ്.