തിരുവനന്തപുരം: ഡിപ്ലോമാറ്റിക് സ്വര്‍ണക്കടത്ത് കേസില്‍ മുഖ്യമന്ത്രിക്കും സര്‍ക്കാറിനുമെതിരെ ആക്രമണം ശക്തമാക്കി പ്രതിപക്ഷം. മുഖ്യമന്ത്രി രാജിവെക്കണമെന്ന് പ്രതിപക്ഷം ആവശ്യപ്പെട്ടു. കേസില്‍ സി.ബി.ഐ അന്വേഷണം നടത്തണമെന്നും പ്രതിപക്ഷ നേതാവ് രമേശ് ചെന്നിത്തല ആവര്‍ത്തിച്ചു. ഈ സ്ഥാനത്തിരുന്നു കൊണ്ട് ശരിയായ അന്വേഷണം നടത്താനാവില്ലെന്നും അദ്ദേഹം ചൂണ്ടിക്കാട്ടി.

മുഖ്യമന്ത്രി കണ്ണടച്ച് പാലുകുടിക്കുകയായിരുന്നു. സ്വപ്നയെ നിയമിച്ചത് ആരെന്ന് വ്യക്തമാക്കണം. മുഖ്യമന്ത്രി രാജിവെക്കണം. മുഖ്യമന്ത്രിയുടെ ഓഫിസ് അന്വേഷണ പരിധിയില്‍ ഉള്‍പെടുത്തണമെന്നും അദ്ദേഹം പറഞ്ഞു.

കള്ളക്കടത്ത് കേസില്‍ പൊലിസ് വീഴ്ച വരുത്തിയെന്ന് അദ്ദേഹം ചൂണ്ടിക്കാട്ടി. വിവാദ സ്ത്രീയെ പൂര്‍ണമായി സംരക്ഷിക്കുന്നു. ഐ.ടി സെക്രട്ടറിയെ ന്യായീകരിക്കുന്നു. അഴിമതികള്‍ അന്വേഷിക്കാന്‍ മുഖ്യമന്ത്രി തയ്യാറായില്ല- അദ്ദേഹം കുറ്റപ്പെടുത്തി. സ്വപ്നക്ക് സര്‍ക്കാറുമായി അടുത്ത ബന്ധം. കള്ളക്കടത്ത് പ്രതികളെ രക്ഷിക്കാന്‍ മുഖ്യമന്ത്രിയുടെ ഓഫിസ് ഇടപെട്ടു. അന്വേഷണം വൈകിപ്പിക്കാനും മുഖ്യമന്ത്രിയുടെ ഓഫിസ് ഇടപെട്ടു. അതിനാലാണ് അന്വേഷണം ഇത്രയും കാലം ഇഴഞ്ഞു നീങ്ങിയത്. സ്റ്റേറ്റ് കാറില്‍ സ്വര്‍ണം കടത്തിയെന്ന വാര്‍ത്തയുടെ നിജസ്ഥിതി പുറത്തു കൊണ്ടുവരണം. നിയമനം അറിഞ്ഞില്ലെന്നും അതി പ്ലേസ്‌മെന്റ് ഏജന്‍സിക്കുമേല്‍ കെട്ടിവെക്കുകയും ചെയ്യുന്ന നടപടി എത്ര ബാലിശമാണെന്നും അദ്ദേഹം ചോദിച്ചു.

രാജ്യാന്തര ബന്ധമുള്ള കള്ളക്കടത്തുകള്‍ ചെയ്യാന്‍ യു.ഡി.എഫിന് കഴിയില്ലെന്നും അതിന് എല്‍.ഡി.എഫിനേ കഴിയൂ എന്നും ചെന്നിത്തല പരിഹസിച്ചു.