ദമാം: കൊവിഡ് ബാധിക്കുന്ന പ്രവാസികളുടെ കണക്കവതരിപ്പിക്കുന്ന  കേരള സർക്കാരിന്റെ  സമീപനത്തിനെതിരെ കേരള  ഹൈകോടതിയിൽ ഹർജി. സഊദി അറേബ്യയിലെ അൽഖോബാർ കെഎംസിസി  സെൻട്രൽ കമ്മിറ്റിക്ക് വേണ്ടി വനിതാ വിംഗ് അംഗവും കേരള കോർഡിനേറ്ററുമായ ബദരിയ  ഫരീദാണ് കേരള ഹൈക്കോടതിയിൽ ഹരജി  നൽകിയത്. ഓരോ ദിവസവും വിദേശത്തു നിന്നും അത് പോലെ മറ്റുസംസ്ഥാനങ്ങളിൽ നിന്നും വന്ന ഇത്ര ഇത്ര ആളുകൾക്കാണ് കൊവിഡ് ബാധിച്ചിരിക്കുന്നത് എന്ന കണക്കവതരണം പ്രവാസികളെ ശത്രുക്കളായി കാണാനിടവരുത്തുന്നതിനാൽ ഇതു  ഒഴിവാക്കണമെന്നാണ്  ഹർജിയിലെ  പ്രധാന  ആവശ്യം.

     ഇരയുടെ സ്വകാര്യത നിലനിർത്തുവാനുള്ള  ഉത്തരവാദിത്ത്വം  അരക്കിട്ടുറപ്പിച്ചു ലോകാരോഗ്യ സംഘടന ഉൾപ്പെടെയുള്ള  ഏജൻസികൾ പ്രോട്ടോക്കോൾസ് പുറത്തിറക്കിയിട്ടുണ്ട്. എന്നാൽ കൊവിഡ് ബാധിതരുടെ എണ്ണം പറയുന്നത് കൂടാതെ പ്രവാസികൾ  എന്ന ഒരു  വിഭാഗത്തെ പ്രത്യേകമായി എടുത്തുപറയുകയും അവർ വന്ന വിദേശ രാജ്യത്തിന്റെ പേരുൾപ്പെടെയുള്ള അവരുടെ തദ്ദേശ സ്ഥലങ്ങൾ വിവരങ്ങൾ പുറത്തറിയിക്കുന്ന നിലവിലെ രീതി പ്രവാസികളായ    വ്യക്തികളുടെ സ്വകാര്യതക്കും മനുഷ്യവകാശങ്ങള്‍ക്കും മേലുള്ള ലംഘനമാണെന്നും കൂടാതെ പ്രവാസികളെ  ശത്രുക്കളായി കാണാൻ  ഇതു ഇടവരുത്തുന്നുവെന്നും ഹർജിയിൽ ചൂണ്ടിക്കാണിക്കുന്നു. അഡ്വ: ജോസ് എബ്രഹാം മുഖേനയാണ് ഹരജി നൽകിയത്. നാളെ രാവിലെ ഹരജി പരിഗണിക്കും.

      ഗൾഫടക്കം പ്രവാസ ലോകത്ത് കൊവിഡ് റിപ്പോർട്ട് ചെയ്തിട്ടും അവർ ജോലി ചെയ്യുന്ന രാജ്യങ്ങൾ ദേശ ഭാഷ വ്യത്യാസങ്ങൾ ഇല്ലാതെയുള്ള കണക്കുകളാണ് അവിടുത്തെ ആരോഗ്യ മന്ത്രാലയങ്ങൾ പുറപ്പെടുവിക്കുന്നതെന്നും എന്നാൽ മടങ്ങിയെത്തുന്ന സ്വന്തം ജന്മഭൂമിയിൽ പ്രവാസികളെ മൊത്തത്തിൽ രോഗഹേതു ആക്കുന്നവരായി സംസ്ഥാന സര്ക്കാര് തന്നെ ചിത്രീകരിക്കുന്നത്  അവസാനിപ്പിക്കണമെന്നും അല്‍ഖൊബാര്‍ കെഎംസിസി സെന്‍ട്രല്‍ കമ്മിറ്റി ഭാരവാഹികളായ പ്രസിഡണ്ട് സിദ്ധീഖ് പാണ്ടികശാല ജനറല്‍ സെക്രട്ടറി സിറാജ് ആലുവ, ട്രഷറര്‍ നജീബ് ചീക്കിലോട് എന്നിവര്‍  ആവശ്യപ്പെട്ടു.