പാലക്കാട്:  ഇടതു സ്ഥാനാര്‍ഥി എം.ബി രാജേഷിന്റെ തെരഞ്ഞെടുപ്പു പ്രചാരണത്തില്‍ പങ്കെടുത്ത ബൈക്ക് യാത്രികരില്‍ നിന്ന് വടിവാള്‍ താഴെ വീണത് വിവാദമായതോടെ സി.പി.എം കുരുക്കിലായി. പര്യടന വാഹനങ്ങള്‍ വെളളിയാഴ്ച്ച ഒറ്റപ്പാലം ഉമ്മനഴി ഭാഗത്തെത്തിയപ്പോഴായിരുന്നു സംഭവം. സ്ഥാനാര്‍ഥിയുടെ വാഹനത്തിന് തൊട്ടുപിന്നാലെ എത്തിയ ബൈക്കുകളിലൊന്നില്‍നിന്നാണ് വടിവാള്‍ ഊര്‍ന്നുവീണത്. സംഭവം ആളുകളുടെ ശ്രദ്ധയില്‍പ്പെട്ടതോടെ മറ്റു ബൈക്കുകള്‍ മറിഞ്ഞ ബൈക്കിനെ വളഞ്ഞുനിന്നു. തുടര്‍ന്ന് പ്രവര്‍ത്തകന്‍ വടിവാളെടുത്ത് പോവുകയും ചെയ്തു. ഉമ്മനഴി കോണ്‍ഗ്രസ് പാര്‍ട്ടി ഓഫീസിന് മുന്‍വശമായതിനാല്‍ സ്ഥാനാര്‍ഥിയുടെ പര്യടനം മൊബൈലില്‍ പകര്‍ത്തിയ നാട്ടുകാര്‍ക്കെല്ലാം ദൃശ്യങ്ങള്‍ ലഭിച്ചു. ഒരുപാട് പേര്‍ക്ക് ലഭിച്ച വിഡിയോ പകര്‍ത്തി സമൂഹമാധ്യമങ്ങളില്‍ പ്രചരിച്ചതാണ് സി.പി.എമ്മിനെ പ്രതിരോധത്തിലാക്കിയത്. സംഭവം വിവാദമായതോടെ കോണ്‍ഗ്രസും, ബി.ജെ.പി.യും, സി.പി.എമ്മിനെതിരെ രൂക്ഷവിമര്‍ശനവുമായി രംഗത്തെത്തിയിരിക്കുകയാണ്. സി.പി.എം നാടൊട്ടുക്കും അക്രമം നടത്തുന്നതിന്റെ തെളിവാണിതെന്നായിരുന്നു കോണ്‍ഗ്രസ്, ബി.ജെ.പി. നേതാക്കളുടെ ആരോപണം. സംഭവം നടന്ന പുലാപ്പറ്റ ഉമ്മനഴി, കോണിക്കഴി ഭാഗങ്ങളില്‍ ഇടക്കിടെ സി.പി.എം-കോണ്‍ഗ്രസ്, സി.പി.എം-ബി.ജെ.പി. സംഘര്‍ഷങ്ങള്‍ നടക്കുന്ന പ്രദേശമാണ്. ഈ വിഷയത്തില്‍ നിരവധി കോണ്‍ഗ്രസ് ബി.ജെ.പി. നേതാക്കളാണ് പ്രതികരണവുമായി മുന്നോട്ടുവന്നിരിക്കുന്നത്. മാത്രമല്ല സോഷ്യല്‍ മീഡിയയും സംഭവം ഏറ്റെടുത്തതോടെ സി.പി.എമ്മിനേയും പാലക്കാട് മണ്ഡലം എല്‍.ഡി.എഫ് സ്ഥാനാര്‍ഥിയേയും തീര്‍ത്തും പ്രതിസന്ധിയിലാക്കി. പ്രചാരണ വേദികളിലെല്ലാം വടിവാള്‍ സംഭവത്തിന് മറുപടി നല്‍കേണ്ട ഗതികേടിലാണ് സി.പി.എമ്മും സ്ഥാനാര്‍ഥി രാജേഷും. അക്രമ രാഷ്ട്രീയത്തിന്റെ വക്താക്കളാണ് യു.ഡി.എഫ് എന്ന പ്രതിപക്ഷാരോപണം ശരിവെക്കുന്നതാണ് വടിവാള്‍ കണ്ടെത്തിയ സംഭവമെന്നാണ് സോഷ്യല്‍ മീഡിയകളിലെ ആരോപണം. ഇടതുപക്ഷത്തിന് തെരഞ്ഞെടുപ്പിലുള്ള മേല്‍ക്കൈ നഷ്ടപ്പെടാന്‍ ഈ സംഭവം കാരണമാകുമെന്നാണ് വിലയിരുത്തല്‍.

യൂത്ത് കോണ്‍ഗ്രസ് പരാതി നല്‍കി

പാലക്കാട്: ഒറ്റപ്പാലത്ത് ഉമ്മനഴിയില്‍ എല്‍.ഡി.എഫ്. സ്ഥാനാര്‍ഥിയുടെ പര്യടനത്തിനിടെ ബൈക്കില്‍ നിന്ന് വടിവാള്‍ വീണ സംഭവത്തില്‍ യൂത്ത് കോണ്‍ഗ്രസ് പരാതി നല്‍കി. വടിവാള്‍ വീണ സംഭവം തിരഞ്ഞെടുപ്പ് അട്ടിമറിക്കാനുള്ള പ്രവര്‍ത്തനമാണെന്ന് ചൂണ്ടിക്കാണിച്ചാണ് യൂത്ത് കോണ്‍ഗ്രസ് നേതാവ് എം.ധനീഷ് ലാല്‍ മുഖ്യ തിരഞ്ഞെടുപ്പ് ഓഫീസര്‍ ടിക്കാറം മീണയ്ക്ക് പരാതി നല്കിയത്. സമൂഹത്തില്‍ അക്രമമുണ്ടാക്കാനും ആളുകളെ ഭയപ്പെടുത്തി കൂടെനിര്‍ത്താനുമുള്ള ഗൂഢശ്രമമാണ് വടിവാള്‍ വീണതോടെ വെളിപ്പെട്ടതെന്നാണ് ആരോപണം.

നവോത്ഥാനം താഴെവീണു: ഷാഫി പറമ്പില്‍

പാലക്കാട്ടെ ഇടതു സ്ഥാനാര്‍ഥി എം.ബി. രാജേഷിന്റെ ഒറ്റപ്പാലം നിയോജകമണ്ഡലം പര്യടനത്തിനിടെ നടന്ന ബൈക്കുവീഴ്ചയില്‍ വടിവാള്‍ തെറിച്ചുവീണ സംഭവത്തില്‍ ഷാഫി പറഞ്ഞതിങ്ങനെ. 'ഇടതിന്റെ നവോത്ഥാനം മുന്നേറ്റം താഴെ വീണു. ബൈക്കിലെത്തിയ മറ്റുള്ളവര്‍ മറച്ച് പിടിച്ച് അത് തിരികെ കൈയിലെടുത്ത് അവര്‍ നവോത്ഥാന യാത്ര തുടര്‍ന്നു.' ഇപ്പോഴത്തെ ഇടതന്മാര്‍ക്ക് പറ്റിയ ചിഹ്നം വടിവാള്‍ ആണെന്നും ഷാഫിപറഞ്ഞു.