തൊടുപുഴ:  സ്‌പെയര്‍ പാര്‍ട്‌സ് ക്ഷാമം രൂക്ഷമായതോടെ ജില്ലയിലെ കെ.എസ്.ആര്‍.ടി.സി ബസുകള്‍ കട്ടപ്പുറത്തേക്ക്. ടയര്‍, ഓയില്‍, ഗ്രീസ്, ലൈനര്‍ തുടങ്ങി അത്യാവശ്യമുളള സാമഗ്രികള്‍ ലഭിക്കാനില്ല. ഗ്രീസ് ചെയ്യല്‍ നിലച്ചതോടെ ബസുകളിലെ പല ഉപകരണങ്ങളുടെയും തേയ്മാനം കൂടി. ബ്രേക്ക് ലൈനര്‍ ഇല്ലാത്തതും സര്‍വീസ് നടത്തുന്നതിനു പ്രതിസന്ധിയായി.
ജില്ലയിലെ എല്ലാ ഡിപ്പോകളും ബ്രേക്കില്ലാത്ത വണ്ടികള്‍കൊണ്ടു നിറയുകയാണ്. പുതിയതായി നിരത്തിലിറങ്ങിയ ബസുകളുടെ മുന്‍വശത്തെ ലൈനറുകള്‍ക്കും പഴയ വണ്ടികളുടെ പിന്‍ ഭാഗത്തെ ലൈനറുകള്‍ക്കും ക്ഷാമമുണ്ട്. സമീപ ഡിപ്പോകളിലെ ലൈനറുകള്‍ വാങ്ങിയാണ് ഇത്രയും കാലം ബസുകള്‍ നിരത്തിലിറക്കിയിരുന്നത്.  എന്നാല്‍ എല്ലാ ഡിപ്പോകളിലും ലൈനറില്ലാതായതോടെ കൂടുതല്‍ ബസുകള്‍ കട്ടപ്പുറത്താകും.
ഹൈറേഞ്ച് സര്‍വീസ് നടത്തുന്ന ബസുകള്‍ക്ക് 25 - 30 ദിവസം കൂടുമ്പോള്‍ ലൈനറുകള്‍ മാറണം. പല ബസുകളുടെയും ലൈനറുകള്‍ പകുതിയിലേറെ തേഞ്ഞു തീര്‍ന്ന നിലയിലാണ്. ഹൈറേഞ്ച് സര്‍വീസ് നടത്തുന്ന ബസുകള്‍ പലതും ഇപ്പോള്‍ ബ്രേക്കിട്ടാല്‍ നില്‍ക്കാത്ത സ്ഥിതിയിലാണ്.
ഇതോടെ വാഹനത്തില്‍ ജോലി ചെയ്യുന്നതിനു ജീവനക്കാരും മടിക്കുന്നു. ആവശ്യത്തിന് ലൈനറുകള്‍ ജില്ലയില്‍ എത്തിയില്ലെങ്കില്‍ പകുതിയോളം സര്‍വീസുകള്‍ നിലയ്ക്കുമെന്ന് ജീവനക്കാര്‍ പറയുന്നു.
ഡിപ്പോകളിലെത്തിയാല്‍ ആവശ്യത്തിനു ഡീസലും ലഭിക്കാറില്ല. ദീര്‍ഘദൂര ബസുകള്‍ പല ഡിപ്പോകളില്‍ നിന്നും ലഭിക്കുന്ന ഡീസല്‍ ആശ്രയിച്ചാണ് സര്‍വീസ് നടത്തുന്നത്.