പുത്തന്‍ചിറ: ജീവിതസുഖങ്ങളില്‍ അഭിരമിക്കുന്നവര്‍ക്കു മനുഷ്യനാകാന്‍ കഴിയില്ലെന്നും അവരില്‍ നിന്നു മനുഷ്യത്വം നഷ്ടപ്പെട്ട് പോകുമെന്നും അന്താരാഷ്ട്ര ഇസ്‌ലാമിക് യൂനിവേഴ്‌സിറ്റീസ് ലീഗ് മെമ്പര്‍ ആദൃശേരി ഹഖീം ഫൈസി.
അതുകൊണ്ട് തന്നെ പഠന കാലത്ത് പരിമിതമായ സൗകര്യങ്ങളിലൂടെ കടന്ന് പോകുന്നവര്‍ക്കാണ് അറിവിന്റെ ആഴക്കടല്‍ നീന്തികടന്നു മാനവികതയെ മനസില്‍ കുടിയിരുത്താന്‍ സാധിക്കുകയുള്ളൂവെന്നും അദേഹം പറഞ്ഞു.
കെയ്‌റോ ആസ്ഥാനമായി പ്രവര്‍ത്തിക്കുന്ന അന്താരാഷ്ട്ര ഇസ്‌ലാമിക് യൂനിവേഴ്‌സിറ്റീസ് ലീഗ് മെമ്പറായി തെരഞ്ഞെടുക്കപ്പെട്ട പ്രമുഖ വിദ്യാഭ്യാസ ചിന്തകനായ ആദൃശേരി ഹഖീം ഫൈസിക്ക് പുത്തന്‍ചിറ എം.ഐ.സി വാഫി കോളജില്‍ നല്‍കിയ സ്വീകരണ സമ്മേളനത്തില്‍ പ്രഭാഷണം നടത്തുകയായിരുന്നു അദേഹം.
പുത്തന്‍ചിറ വാഫി കാംപസില്‍ നടന്ന സ്വീകരണ സമ്മേളനവും വാഫി ഓറിയന്റേഷന്‍ മീറ്റും കിഴക്കേ പുത്തന്‍ചിറ മുന്‍ ഖത്തീബ് അബൂബക്കര്‍ ഫൈസി ചെങ്ങമനാട് ഉദ്ഘാടനം ചെയ്തു.
സി.ഐ.സി അസിസ്റ്റന്റ് കോഡിനേറ്റര്‍ അഹ്മദ് ഫൈസി കക്കാട് മുഖ്യപ്രഭാഷണം നടത്തി. പുത്തന്‍ചിറ എം.ഐ.സി പ്രസിഡന്റ് അബ്ദുല്‍ അസീസ് ഹാജി അധ്യക്ഷനായി.
അബൂബക്കര്‍ ബാഖവി കോല്‍പാടം , അബൂബക്കര്‍ ഫൈസി കാക്കനാട്, ബീരാന്‍ ഹാജി, മന്‍സൂര്‍ ഹുദവി, പുത്തന്‍ചിറ വാഫി കോളജ് പ്രിന്‍സിപ്പാള്‍ സുഹൈല്‍ വാഫി, പുത്തന്‍ചിറ എം.ഐ.സി പ്രസിഡന്റ് അബ്ദുല്‍ അസീസ്, സെക്രട്ടറി എ.എ ഇസ്മാഈല്‍, കെ.കെ കമാലുദ്ദീന്‍ സംസാരിച്ചു. ഹാഫിള് അഹ്മദ് നദ്‌വി ഖിറാഅത്ത് നടത്തി. ഹാഫിള് അസ്‌ലം, പി.എസ് റിയാസ് വാഫി ഗീതം ആലപിച്ചു.