ന്യൂയോര്‍ക്ക്: ഇന്ത്യയും ചൈനയും തമ്മില്‍ യുദ്ധമുണ്ടാവുകയാണെങ്കില്‍ യു.എസ് പ്രസിഡന്റ് ട്രംപ് ഇന്ത്യയെ പിന്തുണയ്ക്കുമെന്നതിന് യാതൊരു ഉറപ്പുമില്ലെന്ന് ട്രംപിന്റെ മുന്‍ ദേശീയ സുരക്ഷാ ഉപദേഷ്ടാവ് ജോണ്‍ ബോള്‍ട്ടന്‍. ഇന്ത്യയും ചൈനയില്‍ തമ്മില്‍ നിലനില്‍ക്കുന്ന അതിര്‍ത്തി തര്‍ക്കത്തിന്റെ ചരിത്രം ട്രംപിന് അറിയുമെന്ന് തോന്നുന്നില്ലെന്നും അദ്ദേഹം വിയോന്‍ ടി.വി ചാനലിനു നല്‍കിയ അഭിമുഖത്തില്‍ പറഞ്ഞു. 

ചൈനയുമായുള്ള ബന്ധത്തെ വ്യാപാര കണ്ണിലൂടെയായിരിക്കും ട്രംപ് കാണുക. യു.എസില്‍ നിന്നും മറ്റു രാഷ്ട്രങ്ങളില്‍ നിന്നും ചൈന ബൗദ്ധികസ്വത്തുക്കള്‍ മോഷ്ടിച്ചിട്ടുണ്ട്. സാങ്കേതികവിദ്യാ കൈമാറ്റത്തിലൂടെ സാമ്പത്തിക-സൈനിക ശക്തി നേടിയ ചൈനയുമായുള്ള വ്യാപാരത്തിന് പ്രാധാന്യമുണ്ട്. 

തെരഞ്ഞെടുപ്പിനു ശേഷം ട്രംപ് എന്താണ് ചെയ്യുകയെന്ന് അറിയില്ല. ഉയിഗൂര്‍ മുസ്‌ലിംകളെ കോണ്‍സണ്‍ട്രേഷന്‍ ക്യാപുകളിലടച്ചതിനും ഹോങ്കോങ്ങിലെ അടിച്ചമര്‍ത്തലിലും അദ്ദേഹം ചൈനയെ വിമര്‍ശിക്കാന്‍ പോകുന്നില്ല. ചൈനയുമായി വീണ്ടും വന്‍ വ്യാപാരകരാറില്‍ ഒപ്പുവയ്ക്കാനായിരിക്കും അദ്ദേഹത്തിന്റെ ശ്രമം. കാര്യങ്ങള്‍ ഇങ്ങനെയായതിനാല്‍ ഇന്ത്യ-ചൈന സംഘര്‍ഷമുണ്ടായാല്‍ ട്രംപ് ഇന്ത്യയെ പിന്തുണയ്ക്കുമെന്ന് ഉറപ്പില്ല. 

ചൈന സാമ്പത്തികമായും സൈനികമായും കരുത്താര്‍ജിച്ചുകൊണ്ടിരിക്കുകയാണ്. അയല്‍ രാജ്യങ്ങളെ സാമ്പത്തികമായി തങ്ങളെ ആശ്രയിക്കുന്നവരാക്കി മാറ്റുകയാണവര്‍. യു.എസ് ഇപ്പോഴും ഉറക്കിലാണ്. ഇത് ഉറക്കില്‍ നിന്ന് എഴുന്നേല്‍ക്കേണ്ട സമയമാണ്. ഇന്ത്യ-ജപ്പാന്‍-യു.എസ് ത്രിരാഷ്ട്ര സഹകരണം ഏറെ ഗുണം ചെയ്യുമെന്നും ബോള്‍ട്ടന്‍ പറഞ്ഞു.