കൊച്ചി: ബംഗളൂരുവില്‍ ഹോട്ടലില്‍ റൂം എടുത്തതിനുപിന്നാലെയാണ് സന്ദീപിന്റെ തിരുവനന്തപുരം തിരുവല്ലത്തെ വീട്ടില്‍ കസ്റ്റംസ് പരിശോധന നടത്തുന്നത് ടിവിയിലൂടെ സ്വപ്നയും സന്ദീപും അറിഞ്ഞത്. 

തുടര്‍ന്ന് സന്ദീപ് വീട്ടിലേക്ക് വിളിച്ചു. പരിശോധന നടത്തുമ്പോള്‍ അവിടെയുള്ളവരുടെ ഫോണ്‍ അന്വേഷണ സംഘം വാങ്ങിവയ്ക്കുക പതിവാണ്. 

ഇതനുസരിച്ച് സന്ദീപിന്റെ സഹോദരന്റെ ഫോണ്‍ കസ്റ്റംസ് വാങ്ങി വച്ചിരുന്നു. ഇതിലേക്ക് വന്ന കോള്‍ സന്ദീപിന്റെതാണെന്നു മനസിലാക്കിയ കസ്റ്റംസ് അപ്പോള്‍ത്തന്നെ വിവരം എന്‍.ഐ.എയെ അറിയിക്കുകയും ഇവരുടെ താമസം കണ്ടെത്തുകയുമായിരുന്നു.

അപ്പോഴും സ്വപ്ന സന്ദീപിനൊപ്പമുണ്ടെന്ന് ഉറപ്പില്ലായിരുന്നു. തിരുവനന്തപുരത്തെ സ്വപ്നയുടെ അടുത്ത ബന്ധുവിന്റെ സഹപാഠിയെ വെള്ളിയാഴ്ചതന്നെ എന്‍.ഐ.എ കണ്ടെത്തിയിരുന്നു. 

ഇവര്‍ കൂടി അംഗമായ കോളജ് ഗ്രൂപ്പിലെ മെസേജ് ട്രാക്ക് ചെയ്താണ് സ്വപ്ന ബംഗളൂരുവിലുണ്ടെന്ന് മനസിലാക്കിയത്. ഹോട്ടല്‍ മുറിയില്‍ സ്വപ്നയുടെ മകള്‍ ഫോണ്‍ ഓണ്‍ ചെയ്തപ്പോള്‍ ഈ മെസേജ് ഡെലിവര്‍ ആവുകയും ലൊക്കേഷന്‍ കണ്ടെത്തുകയുമായിരുന്നു.

തൊട്ടുപിന്നാലെ കര്‍ണാടക പൊലിസിലെ രണ്ടു വനിത പൊലിസുകാര്‍ ഹോട്ടലിലെത്തി ഇവരുടെ സാന്നിധ്യം ഉറപ്പിക്കുകയും ആ ഭാഗത്തേക്ക് ആരെയും കടത്തിവിടാതെ നിലയുറപ്പിക്കുകയും വിവരം എന്‍.ഐ.എക്ക് കൈമാറുകയും ചെയ്തു. 

തുടര്‍ന്ന് ബംഗളൂരുവിലുണ്ടായിരുന്ന എന്‍.ഐ.എ ഹൈദരാബാദ് യൂനിറ്റ് അംഗങ്ങളും മറ്റും ഈ ഹോട്ടലിലെത്തി ഇവരെ കസ്റ്റഡിയിലെടുത്തു. 

ഭര്‍ത്താവിനെയും രണ്ടു മക്കളെയും മറ്റൊരു കേന്ദ്രത്തിലേക്ക് മാറ്റി. സ്വപ്നയെയും സന്ദീപിനെയും ഡൊംലൂരിലെ എന്‍.ഐ.എ കേന്ദ്രത്തിലെത്തിച്ചു.

 തുടര്‍ന്ന് കേസന്വേഷിക്കുന്ന കേരളത്തില്‍നിന്നുള്ള എന്‍.ഐ.എ സംഘം എത്തുകയും ഇവരെ ചോദ്യം ചെയ്യുകയും ഇന്നലെ പുലര്‍ച്ചെ കേരളത്തിലേക്ക് തിരിക്കുകയുമായിരുന്നു.