കണ്ണൂര്‍: ലോക്‌സഭാ തെരഞ്ഞെടുപ്പില്‍ കേരളത്തില്‍ സി.പി.എമ്മിനു ലഭിക്കുന്ന ഓരോ സീറ്റും നരേന്ദ്രമോദിക്ക് അധികാരം നിലനിര്‍ത്താനുള്ള അവസരമാകുമെന്ന് എ.ഐ.സി.സി പ്രവര്‍ത്തകസമിതി അംഗം എ.കെ ആന്റണി. ഈ അപകടം മതേതര കേരളം മനസിലാക്കണമെന്നും അദ്ദേഹം കണ്ണൂര്‍ പ്രസ് ക്ലബിന്റെ മുഖാമുഖം പരിപാടിയില്‍ പറഞ്ഞു.

തെരഞ്ഞെടുപ്പില്‍ നരേന്ദ്രമോദിയെ താഴെയിറക്കലും പിണറായി സര്‍ക്കാരിനെ പാഠം പഠിപ്പിക്കലുമാണു ലക്ഷ്യം. ഓരോ സീറ്റും തെരഞ്ഞെടുപ്പില്‍ നിര്‍ണായകമാണ്. ജനങ്ങള്‍ 20 സീറ്റും യു.ഡി.എഫിനു നല്‍കണം. രാഹുല്‍ ഗാന്ധിയെ എതിര്‍ക്കുന്ന കാര്യത്തില്‍ കേരളത്തിലെ സി.പി.എമ്മും ബി.ജെ.പിയും ഒരേതൂവല്‍ പക്ഷികളാണ്.
ഇടതു സര്‍ക്കാരിനെ പാഠം പഠിപ്പിച്ചാലേ ബാക്കിയുള്ള രണ്ടു വര്‍ഷം നന്നായി ഭരിക്കൂ. ബാലറ്റിലൂടെ കൊലപാതക രാഷ്ട്രീയത്തെ കുഴിച്ചുമൂടാന്‍ കഴിയണം. പാര്‍ട്ടി വളര്‍ത്താനല്ലാതെ ജനകീയ പ്രശ്‌നങ്ങളില്‍ ഇടതു സര്‍ക്കാരിനു താല്‍പര്യമില്ല. സി.പി.എമ്മിന്റെ ഏതെങ്കിലും നേതാവ് ദേശീയതലത്തില്‍ ബി.ജെ.പിക്കെതിരേ പോരാട്ടം നടത്തുന്നുണ്ടോ? പിണറായി വരെ കേരളത്തില്‍ കറങ്ങിനടക്കുകയാണ്.

ബി.ജെ.പിക്കു ബദലാകാന്‍ പറ്റിയ ഏക മുന്നണി യു.പി.എ ആണ്. ശബരിമല പ്രശ്‌നം പരിഹരിക്കാന്‍ അവസരം കിട്ടിയപ്പോള്‍ ബി.ജെ.പി ഒന്നും ചെയ്തില്ല. സുപ്രിംകോടതിയില്‍ അവസരം ലഭിച്ചപ്പോള്‍ മിണ്ടിയില്ല.

ബി.ജെ.പിയും ഇടതുസര്‍ക്കാരും ശബരിമലയുടെ പേരില്‍ കേരളത്തെ കുട്ടിച്ചോറാക്കി. മോദി മനസുവച്ചിരുന്നുവെങ്കില്‍ ഒറ്റ നിയമനിര്‍മാണത്തിലൂടെ ആ പ്രശ്‌നം പരിഹരിക്കാമായിരുന്നു.
ബി.ജെ.പിക്കു വിജയസാധ്യത ഇല്ലാത്ത മണ്ഡലങ്ങളില്‍ സി.പി.എമ്മിനു വോട്ട് മറിക്കുമെന്നു സംശയമുണ്ടെന്നും ആന്റണി പറഞ്ഞു.