തിരുവനന്തപുരം: പതിനാലാം നിയമസഭയുടെ അഞ്ചാം സമ്മേളനം പ്രതിപക്ഷ ബഹളത്തോടെ തുടങ്ങി. സ്ത്രീകളെ അധിക്ഷേപിച്ചു സംസാരിച്ച മന്ത്രി എംഎം മണി രാജിവയ്ക്കണമെന്നാവശ്യപ്പെട്ട് പ്ലക്കാര്‍ഡുകളും ബാനറുകളുമായാണ് പ്രതിപക്ഷം സഭയില്‍ എത്തിയത്. സഭ ആരംഭിച്ചപ്പോള്‍തന്നെ മന്ത്രി മണി രാജിവയ്ക്കണമെന്ന് ആവശ്യപ്പെട്ടു പ്രതിപക്ഷം നടുത്തളത്തില്‍ ഇറങ്ങി.

മണിയെ ന്യായീകരിച്ച് മുഖ്യമന്ത്രി രംഗത്തെത്തി. മണിയുടെ സംസാരം നാട്ടുശൈലിയെന്നു പറഞ്ഞ മുഖ്യമന്ത്രി മണി പറഞ്ഞതിനെ ചിലര്‍ പര്‍വതീകരിച്ചു കാണിക്കുകയാണെന്നും പറഞ്ഞു. മാധ്യമങ്ങളും അതു വളച്ചൊടിച്ചെന്നും മുഖ്യമന്ത്രി പറഞ്ഞു.

വിവാദങ്ങള്‍ക്ക് വിശദീകരണം നല്‍കാന്‍ മണി എഴുന്നേറ്റതോടെ പ്രതിപക്ഷം മണിയെ തടസ്സപ്പെടുത്തി നടുത്തളത്തില്‍ ഇറങ്ങി.

സംസ്ഥാനത്ത് അസാധാരണമായ സാഹചര്യമാണെന്നു പ്രതിപക്ഷ നേതാവ് രമേശ് ചെന്നിത്തല ആരോപിച്ചു.

ചോദ്യോത്തരവേള നിര്‍ത്തിവച്ച് മണിയുടെ പരാമര്‍ശം ചര്‍ച്ചചെയ്യണമെന്ന് ആവശ്യപ്പെട്ട് അടിയന്തര പ്രമേയത്തിന് അവതരണാനുമതി തേടിയ ശേഷമാണ് പ്രതിപക്ഷബഹളം തുടങ്ങിയത്.

ചോദ്യോത്തരവേള തടസപ്പെടുത്തരുതെന്ന് സ്പീക്കര്‍ പി. ശ്രീരാമകൃഷ്ണന്‍ ആവശ്യപ്പെട്ടെങ്കിലും പ്രതിപക്ഷം ഇതു കേള്‍ക്കാന്‍ തയ്യാറായില്ല.

ചോദ്യോത്തരവേള നിര്‍ത്തിവയ്‌ക്കേണ്ട സാഹചര്യമില്ലെന്നു സ്പീക്കര്‍  അറിയിച്ചു. അടിയന്തരപ്രമേയം അനുവദിക്കാമെന്നും സ്പീക്കര്‍ പറഞ്ഞു.