കൊല്ലം: സ്ത്രീകള്‍ മാത്രം താമസിക്കുന്ന വീട്ടിലെ കിടപ്പുമുറിയുടെ കട്ടിലിനടിയില്‍ പതിയിരുന്ന യുവാവിനെ നാട്ടുകാര്‍ കൈയോടെ പിടികൂടി പൊലിസില്‍ ഏല്‍പ്പിച്ചു. നെടുങ്ങോലം പോളച്ചിറ സ്വദേശി ശ്യാംലാലിനെയാണ് നാട്ടുകാര്‍ പിടികൂടിയത്. കഴിഞ്ഞദിവസം ഉച്ചയ്ക്കായിരുന്നു സംഭവം. മകളുമൊന്നിച്ചു ക്ഷേത്രോത്സവ ചടങ്ങുകളില്‍ പങ്കെടുത്തശേഷം വീട്ടില്‍ തിരിച്ചെത്തിയ മധ്യവയസ്‌കയായ വീട്ടമ്മ വസ്ത്രം മാറുന്നതിനിടെയാണു കട്ടിലിനടിയില്‍ ശ്യാംലാലിനെ കണ്ടത്.
ഇതോടെ വീട്ടമ്മയും മകളും ബഹളം വയ്ക്കുകയും നാട്ടുകാരെ വിളിച്ചുകൂട്ടുകയും ചെയ്തു. ഓടിയെത്തിയ നാട്ടുകാര്‍ ശ്യാംലാലിനെ പിടികൂടി കൈകാര്യം ചെയ്തശേഷം പരവൂര്‍ പൊലിസില്‍ വിവരം അറിയിക്കുകയായിരുന്നു.
നാട്ടുകാര്‍ ഓടിയെത്തിയതോടെ രക്ഷപ്പെടാന്‍ ശ്രമിച്ച ഇയാള്‍ വീട്ടമ്മയെ ഉപദ്രവിച്ചതിനെ തുടര്‍ന്നു നിസാര പരുക്കേറ്റു. വീട്ടില്‍ ആരുമില്ലാത്ത തക്കം നോക്കി അടുക്കള വാതില്‍ വഴിയാണ് ഇയാള്‍ അകത്ത് കയറിയതെന്നും നേരത്തെ ഒരു തവണ വീട്ടമ്മയെ ശല്യം ചെയ്തിരുന്നതായും അന്ന് ബന്ധുക്കള്‍ ശ്യാംലാലിനെ താക്കീതു ചെയ്തു വിട്ടയച്ചിരുന്നതായും പൊലിസ് പറഞ്ഞു. ഇയാള്‍ക്കെതിരേ പൊലിസ് കേസെടുത്തു.
കോടതിയില്‍ ഹാജരാക്കി റിമാന്‍ഡ് ചെയ്തു. ശ്യാംലാലിനെ ഉപദ്രവിച്ച് മാരകമായി പരുക്കേല്‍പ്പിച്ചതിനു നാട്ടുകാരായ ആറുപേര്‍ക്കെതിരെയും കേസെടുത്തു.