തിരൂര്‍: ജില്ലയിലെ മികച്ച ഓരുജല മത്സ്യക്കൃഷി അവാര്‍ഡിന് തിരൂര്‍ കൂട്ടായി സ്വദേശി പി. റഷീദ് അര്‍ഹനായി. മംഗലം പുല്ലൂണിയിലെ രണ്ട് ഏക്കറോളം സ്ഥലത്താണ് റഷീദ് മത്സ്യക്കൃഷി നടത്തിയത്. കഴിഞ്ഞ വര്‍ഷം പൂമീന്‍, കരിമീന്‍ എന്നീ ഇനങ്ങളാണ് കൃഷി ചെയ്തത്. നിരവധി വര്‍ഷങ്ങളായി ഇദ്ദേഹം മത്സ്യക്കൃഷി രംഗത്ത് സജീവമാണ്. ഇതിന് മുന്‍പ് ചെമ്മീന്‍ കൃഷി നടത്തിയിരുന്നു. കഴിഞ്ഞ കര്‍ഷകദിനത്തില്‍ മംഗലം പഞ്ചായത്ത് ഇദ്ദേഹത്തെ ആദരിച്ചിരുന്നു. ഈ വര്‍ഷം മികച്ച വിളവ് ലഭിച്ചെങ്കിലും കടുത്ത വേനലില്‍ ജല ലഭ്യത കുറഞ്ഞതോടെ വേഗത്തില്‍ വിളവെടുക്കേണ്ടി വന്നെന്ന് റഷീദ് പറഞ്ഞു. സഹോദരന്‍ പി. മുഹമ്മദ് സലീമിന്റെ സഹായത്തിലാണ് മത്സ്യക്കൃഷി. പഴയകാല കോണ്‍ഗ്രസ് നേതാവ് പരേതനായ പി.അലി അക്ബറിന്റെയും പള്ളിവളപ്പില്‍ ആമിനയുടേയും മകനാണ്. പുറത്തൂര്‍ ശാന്തി നഗര്‍ സ്വദേശി വലിയവീട്ടില്‍ സിദ്ദീഖിനെ മികച്ച ജില്ലാതല അക്വാകള്‍ച്ചര്‍ പ്രൊമോട്ടറായും തെരഞ്ഞെടുത്തിട്ടുണ്ട്.