അരീക്കോട്: കാവനൂര്‍ പഞ്ചായത്തിലെ എളയൂര്‍ പിടിവള്ളിമലയിലെ ചെങ്കല്‍ ഖനനം പരിസരവാസികള്‍ക്ക് ദുരിതമാകുന്നു. ഖനനത്തെ തുടര്‍ന്ന് സമീപത്തുള്ള ഇരുപതോളം വീടുകള്‍ ഉരുള്‍പൊട്ടല്‍ ഭീതിയിലാണ്. രണ്ട് ഏക്കര്‍ സ്ഥലത്ത് രണ്ട് വര്‍ഷം മുന്‍പാണ് ഇവിടെ ഖനനം ആരംഭിച്ചത്.
ലോഡ് കണക്കിന് മണ്ണ് മലയുടെ മുകള്‍ ഭാഗത്ത് കൂട്ടിയിട്ടതും ചെങ്കല്‍പാളികള്‍ അടര്‍ന്നുവീഴാവുന്ന തരത്തിലുള്ളതും മഴ പെയ്തതോടെ ഒലിച്ചിറങ്ങാന്‍ തുടങ്ങിയിട്ടുണ്ട്. മഴവെള്ളം പഴയ കല്ലുവെട്ടുകുഴിയില്‍ തടഞ്ഞു നിര്‍ത്തുന്നതും സമീപത്ത് മണ്ണുമാന്തിയന്ത്രം ഉപയോഗിച്ച് മണ്ണ് നീക്കം ചെയ്ത് സ്ഥലമൊരുക്കുന്നതും ദുരന്തത്തിന് കാരണമാകുമെന്ന് പരിസരവാസികള്‍ പറഞ്ഞു.
ഖനനം നിര്‍ത്തിവയ്ക്കണമെന്നാവശ്യപ്പെട്ട് നാട്ടുകാര്‍ നിരവധി തവണ ജില്ലാ കലക്ടര്‍, വില്ലേജ് ഓഫിസര്‍, ജിയോളജി വകുപ്പ്, ഗ്രാമ പഞ്ചായത്ത് തുടങ്ങിയ വിവിധ വകുപ്പുകളില്‍ പരാതി നല്‍കിയെങ്കിലും യാതൊരു നടപടിയുമുണ്ടായിട്ടില്ല. ഇരുപതോളം കുടുംബങ്ങളുടെ പരാതി വിവിധ വകുപ്പുകള്‍ അവഗണിക്കുകയാണെന്ന ആക്ഷേപവും ഉയര്‍ന്നിട്ടുണ്ട്. കാവനൂര്‍ വില്ലേജ് ഓഫിസര്‍ ഖനനം നടത്തുന്നവര്‍ക്ക് മൗനാനുവാദം നല്‍കുകയാണെന്ന് നാട്ടുകാര്‍ ആരോപിച്ചു.
ചൊവ്വാഴ്ചയുണ്ടായ കനത്ത മഴയില്‍ ക്വാറിയില്‍നിന്ന് മണ്ണും ചെങ്കല്‍ പാളികളും ഒലിച്ചിറങ്ങി പുഷ്പ രതീഷിന്റെ വീടിന് കേടുപാടുകള്‍ സംഭവിച്ചിട്ടുണ്ട്.