കണ്ണൂര്‍: ലോകകപ്പ് ഫുട്‌ബോള്‍ മല്‍സരത്തിന്റെ ആവേശം അലതല്ലിയ കണ്ണൂരിലെ പ്രദര്‍ശന മല്‍സരത്തില്‍ ഫ്രാന്‍സിനെതിരേ ക്രൊയേഷ്യക്കു ജയം. സെന്റ് മൈക്കിള്‍സ് ആംഗ്ലോ ഇന്ത്യന്‍ സ്‌കൂളും കണ്ണൂര്‍ പ്രസ്‌ക്ലബും ചേര്‍ന്നൊരുക്കിയ മല്‍സരം മുഴുസമയവും ഗോള്‍വര്‍ഷത്താല്‍ ആവേശകരമായി. ക്രൊയേഷ്യയെ പ്രതിനിധീകരിച്ച് ഇറങ്ങിയ പ്രസ്‌ക്ലബ് ടീം മൂന്നിനെതിരെ അഞ്ചു ഗോളുകള്‍ക്കാണു ഫ്രാന്‍സിനായി ബൂട്ടുകെട്ടിയ സെന്റ് മൈക്കിള്‍സ് ടീമിനെ തകര്‍ത്തത്.
പ്രസ്‌ക്ലബ് ടീമിനെ ജില്ലാ പഞ്ചായത്ത് പ്രസിഡന്റ് കെ.വി സുമേഷ് നയിച്ചപ്പോള്‍ മുന്‍ ഇന്ത്യന്‍ ക്യാപ്റ്റന്‍ കെ.വി ധനേഷായിരുന്നു സെന്റ് മൈക്കിള്‍സിന്റെ ക്യാപ്റ്റന്‍. തങ്ങളുടെ ടീമിനായി സുമേഷും ധനേഷും ഗോളുകള്‍ നേടുകയും ചെയ്തു.
സെന്റ് മൈക്കിള്‍സ് ഗ്രൗണ്ടില്‍ നടന്ന മല്‍സരം എസ്.പി ജി. ശിവവിക്രം ഉദ്ഘാടനം ചെയ്തു. ജേതാക്കള്‍ക്കുള്ള ട്രോഫികള്‍ കണ്ണൂര്‍ ടെറിട്ടോറിയല്‍ ആര്‍മി സെക്കന്‍ഡ് ഇന്‍ കമാന്‍ഡന്റ് ലഫ്. കേണല്‍ ഗുര്‍മീത് സിങ് വിതരണം ചെയ്തു.
ദിശ ചെയര്‍മാന്‍ സി. ജയചന്ദ്രന്‍ അധ്യക്ഷനായി. പ്രസ്‌ക്ലബ് പ്രസിഡന്റ് എ.കെ ഹാരിസ്, ട്രഷറര്‍ സി.ജി ഉലഹന്നാന്‍, ഫാ. ജോണ്‍ ഫ്രാന്‍സിസ് എസ്.ജെ, പി. തുളസീദാസ് സംസാരിച്ചു.