കോഴിക്കോട്: ദേശീയ സബ്ജൂനിയര്‍ ഫുട്‌ബോള്‍ ചാംപ്യന്‍ഷിപ്പില്‍ ആതിഥേയരായ കേരളം ഇന്ന് സെമി ഫൈനല്‍ മത്സരത്തിന് ഇറങ്ങും. വൈകിട്ട് 3.45നാണ് മത്സരം. ബി ഗ്രൂപ്പിലെ ഒന്നാംസ്ഥാനക്കാരായ മേഘാലയയാണ് എതിരാളി.
ലീഗ് റൗണ്ടില്‍ നാല് കളികള്‍ കളിച്ചതില്‍ നാലും വിജയിച്ചതിന്റെ മികവിലാണ് മേഘാലയയുടെ വരവ്. ഗ്രൂപ്പ് മത്സരത്തില്‍ തമിഴ്‌നാടിനെ 12 ഗോളിന് തോല്‍പ്പിച്ചതും മേഘാലയുടെ നേട്ടമായി കാണാം. ഒഡിഷയോട് പരാജയപ്പെട്ടെങ്കിലും ഉത്തര്‍പ്രദേശിനേയും മധ്യപ്രദേശിനേയും പരാജയപ്പെടുത്തിയും മിസോറമിനെ 2-2 സമനിയില്‍ തളച്ചുമാണ് കേരളം സെമി ഉറപ്പിച്ചത്. അഭയ് ഷണ്‍മുഖന്‍, ഹേമന്ദ്, അബിന്‍ അനൂപ് തുടങ്ങിയവരിലാണ് കേരളത്തിന്റെ മുന്നേറ്റങ്ങള്‍ക്ക് ചുക്കാന്‍ പിടിക്കുന്നത്. ഗോളി സിഥാര്‍ദ്ധിന്റെ പ്രകടനവും ടീമിന് പ്രതീക്ഷയാണ്. പ്രതിരോധ നിരയിലെ ദൗര്‍ബല്യമാണ് ടീമിന് വെല്ലുവിളി.
ഗ്രാസ് റൂട്ട് ഫുടബോളിന്റെ അക്കാദമിക മികവോ, താരപൊലിമയോ ഇല്ലെങ്കിലും കഠിന പരിശ്രമം ചെയ്യാന്‍ താരങ്ങള്‍ തയ്യാറായാല്‍ അത് ടീമിന് മുതല്‍കൂട്ടാകും. നോക്കൗട്ട് റൗണ്ടായതിനാല്‍ അധിക സമയവും ഷൂട്ടൗട്ടിലേക്കും കളി നീണ്ടാല്‍ കായിക ക്ഷമത കൂടി വിലയിരുത്തും. അഞ്ച് വര്‍ഷത്തിന് ശേഷമാണ് കേരളം സെമി കളിക്കുന്നത്. 1982ല്‍ കോഴിക്കോട്ട് നടന്ന ദേശീയ ചാംപ്യന്‍ഷിപ്പിലാണ് കേരളം അവസാനമായി ജേതാക്കളായത്.
ഇന്ന് രാവിലെ 7.30ന് നടക്കുന്ന ആദ്യ സെമിയില്‍ നിലവിലെ ജേതാക്കളായ ബംഗാള്‍ മിസോറമിനെ നേരിടും. മേഘാലയയോട് പരാജയപ്പെട്ടത് ബംഗാളിന്റെ സാധ്യതകളെ തല്ലിക്കെടുത്തുന്നുണ്ട്. വടക്ക് കിഴക്കന്‍ ഫുട്‌ബോള്‍ കരുത്തിന് മുന്നില്‍ പരമ്പരാഗത ഫുട്‌ബോള്‍ അതിജീവിക്കുമോയെന്ന് ഇന്നറിയാം.