ശ്രീനഗര്‍: ജമ്മു കശ്മിരിലെ വിവിധയിടങ്ങളില്‍ തുടര്‍ച്ചയായി തീവ്രവാദികളുമായി ഏറ്റുമുട്ടലുകള്‍ നടക്കുന്നതായി സൈന്യം.
ഇന്നലെ ഷോപ്പിയാനില്‍ നടന്ന ഏറ്റുമുട്ടലില്‍ നാലു തീവ്രവാദികളെ വധിച്ചതായി സൈന്യം അവകാശപ്പെട്ടു. കഴിഞ്ഞ ദിവസം കുല്‍ഗാമില്‍ നടന്ന ഏറ്റുമുട്ടലില്‍ ജയ്‌ഷെ മുഹമ്മദ് കമാന്‍ഡറടക്കം മൂന്നുപേരെ വധിച്ചതായി സൈന്യം വ്യക്തമാക്കിയിരുന്നു. ഈ സംഭവത്തില്‍ നിരവധി ആയുധങ്ങളും പിടിച്ചെടുത്തിരുന്നു.
ഇന്നലെ രാവിലെ ഷോപ്പിയാനിലെ അംഷിപോര ഗ്രാമത്തിലാണ് ഏറ്റുമുട്ടല്‍ നടന്നത്.
ഇവിടെ തീവ്രവാദികളുടെ സാന്നിധ്യമുണ്ടെന്ന വിവരത്തെ തുടര്‍ന്ന് സൈന്യം തിരച്ചിലിനെത്തുകയായിരുന്നു. തുടര്‍ന്നാണ് ഏറ്റുമുട്ടലുണ്ടായതെന്നാണ് സൈന്യം വ്യക്തമാക്കുന്നത്.
കഴിഞ്ഞ ദിവസം കുല്‍ഗാമില്‍ നടന്ന സംഭവത്തില്‍ മൂന്നു സൈനികര്‍ക്കു പരുക്കേല്‍ക്കുകയും ചെയ്തിരുന്നു.