തിരുവനന്തപുരം: മുഖ്യമന്ത്രിയുടെ ഓഫിസിനെപോലും സ്വാധീനിക്കുന്ന തരത്തിലുള്ള ജോലി സ്വന്തമാക്കുന്നതിന് വ്യാജ ബിരുദ സര്‍ട്ടിഫിക്കറ്റ് തയാറാക്കിയ കേസില്‍ സ്വര്‍ണക്കടത്തു കേസിലെ രണ്ടാം പ്രതി സ്വപ്ന സുരേഷിനെ പൊലിസ് കസ്റ്റഡിയില്‍ ആവശ്യപ്പെടും. 

കന്റോണ്‍മെന്റ് പൊലിസാണ് ഇതുസംബന്ധിച്ച് സ്വപ്നക്കെതിരേ കേസെടുത്തിരിക്കുന്നത്. മഹാരാഷ്ട്ര ഡോ.ബാബാ സാഹിബ് അംബേദ്കര്‍ ടെക്‌നോളജി സര്‍വകലാശാലയുടെ പേരിലാണു സ്വപ്ന വ്യാജ ബികോം സര്‍ട്ടിഫിക്കറ്റ് നിര്‍മിച്ചത്. 

വ്യാജ സര്‍ട്ടിഫിക്കറ്റ് എവിടെ നിര്‍മിച്ചു, ആരൊക്കെയാണ് ഇതിനു പിന്നില്‍ പ്രവര്‍ത്തിച്ചത് തുടങ്ങിയ കാര്യങ്ങളാകും പ്രധാനമായും അന്വേഷിക്കുക. സ്വപ്നയെ കസ്റ്റഡിയില്‍ ലഭിച്ചാല്‍ മാത്രമേ ഇതു സംബന്ധിച്ചു കൂടുതല്‍ വ്യക്തത ലഭിക്കുവെന്നാണു പൊലിസ് വിലയിരുത്തല്‍. എന്‍.ഐ.എയും കസ്റ്റംസും നടത്തുന്ന തെളിവെടുപ്പും ചോദ്യം ചെയ്യലും പൂര്‍ത്തിയായ ശേഷമാകും സ്വപ്നയെ കസ്റ്റഡിയില്‍ കിട്ടാന്‍ കോടതിയെ സമീപിക്കുക.

സര്‍ട്ടിഫിക്കറ്റ് വ്യാജമാണെന്നു പ്രാഥമിക അന്വേഷണത്തില്‍ കണ്ടെത്തിയതിനെ തുടര്‍ന്ന് സ്വപ്ന സുരേഷിനെ ഒന്നാം പ്രതിയാക്കി കഴിഞ്ഞ 13ന് എഫ്.ഐ.ആര്‍ റജിസ്റ്റര്‍ ചെയ്തിരുന്നു.