പാലക്കാട്: മലമ്പുഴ ഡാം കയ്യേറി അകമലവാരം മുത്തുകുളത്ത് സ്വകാര്യ സ്ഥലത്തേക്ക് റോഡ് നിര്‍മിക്കുന്നു. രണ്ടു കിലോമീറ്ററോളം റോഡ് ഇപ്പോള്‍ പണിതു കഴിഞ്ഞു. മലമ്പുഴ പഞ്ചായത്തിലെ ഒന്നാം വാര്‍ഡിലുള്‍പ്പെടുന്നതാണ് അകമലവാരം.
ഒരു സ്വകാര്യ സഥലത്തേക്കാണ് റോഡ് നിര്‍മിക്കുന്നത്. ഡാമിന്റെ വൃഷ്ടിപ്രദേശമായ സ്ഥലമാണ് കയ്യേറിയിരിക്കുന്നത്. വെള്ളമില്ലാത്ത സമയത്താണ് സ്ഥലം കയ്യേറി വഴി നിര്‍മിക്കുന്നത്. മണ്ണിട്ടാണ് റോഡ് നിര്‍മിക്കുന്നത്.
ഡാമിന്റെ 100 മീറ്റര്‍ ചുറ്റളവില്‍ ഒരു കാര്യവും ചെയ്യാന്‍ പാടില്ല എന്ന നിയമം ലംഘിച്ചുകൊണ്ടാണ് ഈ അനധികൃത കയ്യേറ്റം. സ്വകാര്യ സഥലത്തേക്ക് മാത്രമായുള്ള വഴിയാണ് നിര്‍മിച്ചുകൊണ്ടിരിക്കുന്നത്. വഴി നിര്‍മാണം ഇത്രയും നാളായിട്ടും അധികൃതര്‍ ഒരു നടപടിയും സ്വീകരിച്ചിട്ടില്ല.
ഡാമിന്റെ പല സ്ഥലങ്ങളും ഇതുപോലെ സ്വകാര്യ വ്യക്തികള്‍ കയ്യേറി കൃഷിയും മറ്റും നടത്തുന്നുണ്ട്. അധികൃതരുടെ കണ്ണടച്ചുള്ള മനോഭാവമാണ് കയ്യേറ്റങ്ങള്‍ കൂടുതലാക്കുന്നത്.