താമരശേരി: കട്ടിപ്പാറ പഞ്ചായത്തിലെ കരിഞ്ചോല, ചമല്‍, കട്ടിപ്പാറ തുടങ്ങിയ പ്രദേശങ്ങളിലുണ്ടായ ഉരുള്‍പൊട്ടലിനെ തുടര്‍ന്ന് വീട് നശിച്ചവരും ഭാഗികമായി തകര്‍ന്നവരുമായ കുടുംബങ്ങളിലുള്ളവരുടെ നഷ്ടപ്പെട്ട രേഖകള്‍ ലഭ്യമാക്കുന്നതിനായി സര്‍ക്കാര്‍ അടിയന്തര നടപടി സ്വീകരിക്കണമെന്ന് മുസ്‌ലിം ലീഗ് ദുരിതാശ്വാസ-പുനരധിവാസ സമിതി യോഗം ആവശ്യപ്പെട്ടു.
ഇതിനായി വിവിധ വകുപ്പുകളുടെ പ്രത്യേക സംയുക്ത ക്യാംപ് സംഘടിപ്പിക്കണം. റേഷന്‍ കാര്‍ഡ്, ആധാരം, ആധാര്‍, തിരിച്ചറിയല്‍ കാര്‍ഡ്, പാസ്‌പോര്‍ട്ട്, സ്‌കൂള്‍ സര്‍ട്ടിഫിക്കറ്റുകള്‍ തുടങ്ങി രേഖകള്‍ എല്ലാം നഷ്ടപ്പെട്ടവര്‍ രേഖകളില്ലാത്തതിനാല്‍ സര്‍ക്കാര്‍ നഷ്ടപരിഹാരം പോലും കിട്ടാതെ വലയുകയാണ്. ഇത് ഗൗരവതരമായ വിഷയമായി കാണാന്‍ സര്‍ക്കാര്‍ തയാറാകണം.
ദുരന്തത്തെ തുടര്‍ന്ന് വാടക വീടുകളില്‍ താമസിക്കുന്നവര്‍ക്ക് വാടകയും സൗജന്യ റേഷനും ചികിത്സാ സൗകര്യവും ഒരുക്കണമെന്നും യോഗം ആവശ്യപ്പെട്ടു. കരിഞ്ചോല ദുരിതത്തില്‍ അകപ്പെട്ടവരുടെ സംഗമം കൂടിയായി മുസ്‌ലിം ലീഗിന്റെ യോഗം. നേതാക്കള്‍ക്ക് മുന്‍പില്‍ ദുരന്തത്തില്‍ നഷ്ടം സംബവിച്ചവര്‍ അവരുടെ വേദനകള്‍ പങ്കുവച്ചു.
മുസ്‌ലിം ലീഗ് സംസ്ഥാന വൈസ് പ്രസിഡന്റ് സി. മോയിന്‍കുട്ടി ഉദ്ഘാടനം ചെയ്തു. സമിതി ചെയര്‍മാന്‍ എം.എ റസാഖ് മാസ്റ്റര്‍ അധ്യക്ഷനായി. ജന. കണ്‍വീനര്‍ നജീബ് കാന്തപുരം, മുഹമ്മദ് മോയത്ത്, താര അബ്ദുറഹ്മാന്‍ ഹാജി, ഒ.കെ.എം കുഞ്ഞി, അബൂബക്കര്‍ കുട്ടി കന്നൂട്ടിപ്പാറ, ഹാരിസ് അമ്പായത്തോട്, പി.സി നാസര്‍, സുബൈര്‍ വെഴുപ്പൂര്‍, കെ.വി അബ്ദുല്‍ അസീസ്, അഷ്‌റഫ് പൂലോട്, ഷാഫി സക്കരിയ കോളിക്കല്‍, മുഹമ്മദ് മുട്ടായി, ഷംസീര്‍ വി.ഒ.ടി, സെയ്തൂട്ടി ഹാജി, വി.കെ മുഹമ്മദലി സംസാരിച്ചു.