നാദാപുരം: കക്കംവെള്ളി കുന്നത്ത് കനാലിനു സമീപം സി.പി.എമ്മിന്റെ സ്തൂപം തകര്‍ത്തതായി പരാതി. കഴിഞ്ഞദിവസം അര്‍ധരാത്രിയാണ് സംഭവം.
 കനാല്‍ റോഡിനു സമീപം സ്ഥാപിച്ച സ്തൂപമാണ് തകര്‍ക്കപ്പെട്ടത്. രണ്ടു ദിവസം മുന്‍പ് പുറമേരി റോഡിലെ ബാലിയില്‍മുക്കില്‍ പഞ്ചായത്ത് നിര്‍മിച്ച പൊതുകിണറിനു മുകളില്‍ പച്ചഛായം പൂശുകയും ലീഗ് ചിഹ്നങ്ങള്‍ വരച്ചിടുകയും ചെയ്തിരുന്നു. തുടര്‍ന്ന് സി.പി.എം പ്രവര്‍ത്തകര്‍ പ്രദേശത്തെ വൈദ്യുതിക്കാലുകളില്‍ പാര്‍ട്ടി ചിഹ്നങ്ങള്‍ വരച്ചു. ഇതുമായി ബന്ധപ്പെട്ട് പ്രദേശത്ത് അസ്വാരസ്യം നിലനില്‍ക്കുന്നുണ്ട്. സംഭവത്തെ കുറിച്ച് നാദാപുരം പൊലിസില്‍ നല്‍കിയ പരാതിയില്‍ കേസെടുത്ത് അന്വേഷണം ആരംഭിച്ചു.