തലശ്ശേരി: നഗരസഭയിലെ തെരുവുവിളക്കുകള്‍ സ്ഥാപിക്കുന്ന പ്രവൃത്തി ഏറ്റെടുത്ത കരാറുകാരന് നഗരസഭാ എന്‍ജിനിയര്‍ പണം നല്‍കാതെ കളിപ്പിച്ച സംഭവത്തില്‍ എന്‍ജിനിയറുടെ ശമ്പളത്തില്‍ നിന്ന് പണം തിരിച്ചുപിടിക്കാന്‍ കൗണ്‍സില്‍ യോഗത്തില്‍ ഏകകണ്ഠമായി തീരുമാനമെടുത്തു.
 നഗരസഭയിലെ തെരുവിളക്കുകള്‍ സ്ഥാപി
ക്കുന്ന പ്രവൃത്തിയുടെ കരാര്‍ കഴിഞ്ഞ സാമ്പത്തിക വര്‍ഷം മുസ്തഫയെന്ന കരാറുകാരനാണ് ടെന്‍ഡര്‍ വഴി നഗരസഭ നല്‍കിയിരുന്നത്. എന്നാല്‍ സാമ്പത്തിക വര്‍ഷം അവസാനിക്കുന്ന മാര്‍ച്ച് 31ന് കരാറുകാരന് ബില്ല് നല്‍കാന്‍ ഒപ്പിട്ട് കൊടുക്കാതെ അസി.എന്‍ജിനിയര്‍ കരാറുകാരനെ വട്ടം കറക്കുകയായിരുന്നു. ഇതേ തുടര്‍ന്ന് കരാറുകാരന്റെ 24,000 രൂപയുടെ ബില്‍തുക നഷ്ടപ്പെടുകയും ചെയ്തു. ഇതേ തുടര്‍ന്ന് പുതിയ സാമ്പത്തിക വര്‍ഷത്തില്‍ ഈ തുക നഗരസഭ കരാറുകാരന് നല്‍കാനാവാത്ത അവസ്ഥയുണ്ടായി. തുടര്‍ന്നാണ് ഇന്നലെ കൗണ്‍സില്‍ യോഗത്തില്‍ പ്രവൃത്തി നടത്തിയ കരാറുകാരന് പണം നല്‍കാന്‍ മാര്‍ഗം തേടണമെന്ന് അംഗങ്ങള്‍ ആവശ്യപ്പെട്ടത്. പൊതുമരാമത്ത് വകുപ്പ് അസി. എന്‍ജിനിയറുടെ ശമ്പളത്തില്‍ നിന്ന് തിരിച്ച് പിടിച്ച് നല്‍കണമെന്ന് കൗണ്‍സില്‍ യോഗം ഐക്യകണ്‌ഠേന തീരുമാനിക്കുകയും ചെയ്തു. എന്‍ജിനിയരോട് നേരത്തെ നോട്ടിസ് മുഖേന ഇക്കാര്യത്തില്‍ വിശദീകരണം ആവശ്യപ്പെട്ട കാര്യം നഗരസഭാ സെക്രട്ടറി കൗണ്‍സില്‍ യോഗത്തെ അറിയിച്ചു. നോട്ടിസിന് മറുപടി ലഭിച്ചിരുന്നില്ല. തലശ്ശേരി മൊത്ത മത്സ്യമാര്‍ക്കറ്റിന്റെ കെട്ടിടം തകര്‍ന്ന് വീഴാറായ നിലയിലാണെന്നും ഇക്കാര്യത്തില്‍ നടപടി സ്വീകരിക്കണമെന്നും മുസ്‌ലിം ലീഗ് കൗണ്‍സില്‍ പാര്‍ട്ടി ലീഡര്‍ പി.പി
സാജിത ആവശ്യപ്പെട്ടു. സാമൂഹ്യസുരക്ഷാ പെന്‍ഷന്‍ കിട്ടാത്തതു സംബന്ധിച്ച പരാതിയില്‍ അദാലത്ത് വച്ച് പെന്‍ഷന്‍ ലഭിക്കാത്തവരുടെ കാര്യത്തില്‍ തീരുമാനമെടുക്കാമെന്ന് ചെയര്‍മാന്‍ യോഗത്തെ അറിയിച്ചു. തലശ്ശേരി പഴയ ബസ്സ്റ്റാന്റ് പരിസരത്തെ ഓട്ടോ സ്റ്റാന്റില്‍ ഓട്ടോകള്‍ നിര്‍ത്തിയിടാതെ ഭൂരിഭാഗം ഓട്ടോകളും ഷോപ്പിങ് കോംപ്ലക്‌സിനു മുന്നിലും മറ്റും നിര്‍ത്തിയിട്ട് യാത്രക്കാരെ കയറ്റുകയാണെന്നും യോഗത്തില്‍ അഭിപ്രായമുയര്‍ന്നു. കാലാവസ്ഥ അനുയോജ്യമല്ലാത്ത അവസ്ഥയില്‍ മൃഗ സംരക്ഷണ പദ്ധതികള്‍ നടപ്പിലാക്കിയതിനെ തുടര്‍ന്ന് പദ്ധതികള്‍ പലതും ലക്ഷ്യം കണ്ടില്ലെന്നും പൊതുമരാമത്ത് വകുപ്പിന്റെ പ്രവര്‍ത്തനം കാര്യക്ഷമമല്ലെന്നും അഭിപ്രായമുയര്‍ന്നു.
പ്രവര്‍ത്തിയില്‍ അലംഭാവം കാണിക്കുന്ന ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കാനും കൗണ്‍സില്‍ യോഗത്തില്‍ തീരുമാനമായി. കരാറുകാരെ പൊതുമരാമത്ത് വകുപ്പ് പീഡിപ്പിക്കുകയാണെന്നും ഇതുമൂലം പല പ്രവൃത്തികളും മുടങ്ങിക്കിടക്കുകയാണെന്നും പരാതിയുയര്‍ന്നു. കെ വിനയരാജ്, വിജയന്‍, സുരേഷ്ബാബു, എം.പി അരവിന്ദാക്ഷന്‍, ഇ.കെ ഗോപിനാഥ്, സ്മിത, അഡ്വ.വി രത്‌നാകരന്‍ ചര്‍ച്ചയില്‍ പങ്കെടുത്തു. ചെയര്‍മാന്‍ സി.കെ രമേശന്‍ അധ്യക്ഷനായി.