മക്ക: ഈ വര്‍ഷത്തെ വിശുദ്ധ ഹജ്ജ് കര്‍മം അടുത്തയാഴ്ച നടക്കാനിരിക്കെ ആദ്യ ഹജ്ജ് സംഘം പുണ്യ ഭൂമിയിലെത്തി. വിദേശ രാജ്യങ്ങളില്‍ നിന്നും ഹാജിമാര്‍ ഇല്ലെങ്കിലും ആഭ്യന്തര ഹാജിമാരുടെ ആദ്യ സംഘമാണ് വിശുദ്ധ ഭൂമിയിലെത്തിയത്. ഖസീം പ്രവിശ്യയില്‍ നിന്നും ജിദ്ദ കിങ് അബ്ദുല്‍ അസീസ് വിമാനത്താവളത്തില്‍ എത്തിച്ചേര്‍ന്ന ആദ്യ ഹജ്ജ് സംഘത്തെ ഹജ്ജ്,ഉംറ കാര്യ മന്ത്രാലയ ഉദ്യോഗസ്ഥരും വിമാനത്താവള ഉന്നതാധികൃതരും ചേര്‍ന്ന് സ്വീകരിച്ചു.
അതേസമയം, വിശുദ്ധ കഅ്ബാലയത്തെ അണിയിക്കുന്നതിനുള്ള പുതിയ കിസ്‌വ കൈമാറി. സല്‍മാന്‍ രാജാവിനെ പ്രതിനിധീകരിച്ച് രാജാവിന്റെ ഉപദേഷ്ടാവും മക്ക ഗവര്‍ണറുമായ ഖാലിദ് അല്‍ഫൈസല്‍ രാജകുമാരനാണ് കഅ്ബാലയത്തിന്റെ താക്കോല്‍ സൂക്ഷിപ്പ് ചുമതലയുള്ള അല്‍ശൈബി കുടുംബത്തിലെ കാരണവര്‍ ഡോ. സ്വാലിഹ് ബിന്‍ സൈനുല്‍ ആബിദീന്‍ അല്‍ശൈബിക്ക് കിസ്‌വ കൈമാറിയത്. ഹറം കാര്യ വകുപ്പ് മേധാവി ഡോ. അബ്ദുറഹ്മാന്‍ അല്‍ സുദൈസ്, കിങ് അബ്ദുല്‍ അസീസ് ഹറം കാര്യ വകുപ്പ് അണ്ടര്‍ സെക്രട്ടറിയുമായ അഹ്മദ് അല്‍ മന്‍സൂരി എന്നിവരും സന്നിഹിതരായിരുന്നു.