പ്രതിപക്ഷത്തിന് പിണറായിയുടെ പരിഹാസം

തിരുവനന്തപുരം: ഓഫിസില്‍ എന്‍.ഐ.എ വന്നതുകൊണ്ട് മുഖ്യമന്ത്രി രാജിവെക്കണമെന്ന പ്രതിപക്ഷത്തിന്റെ ആവശ്യമൊക്കെ മോഹമല്ലേയെന്നും അങ്ങനെ എന്തൊക്കെ മോഹങ്ങള്‍ കാണുമെന്നും ഞാനെത്തു പറയാനെന്നും പിണറായിയുടെ പരിഹാസം. ഇതു സംബന്ധിച്ചുള്ള മാധ്യമ പ്രവര്‍ത്തകരുടെ ചോദ്യത്തോടു പ്രതികരിക്കുകയായിരുന്നു മുഖ്യമന്ത്രി.

 സി.സി.ടി.വി വിഷയത്തിലും മുഖ്യമന്ത്രി പ്രതിപക്ഷത്തെ പരിഹസിച്ചു. ഞാന്‍ പിടിച്ച മുയലിന് കൊമ്പ് നാലാണ് എന്നതാണ് പ്രതിപക്ഷത്തിന്റെ മനോഭാവം. എന്തോ ഒരു കടലാസ് കിട്ടി, അതും പൊക്കിപ്പിടിച്ച് ഇതാ കിട്ടിപ്പോയി എന്നും പറഞ്ഞ് പുറപ്പെട്ടതല്ലേ അബദ്ധമെന്നും അദ്ദേഹം പരിഹസിച്ചു. 

സാധാരണ നിലയ്ക്ക് കിട്ടിയ കാര്യങ്ങളൊന്ന് വിലയിരുത്താന്‍ തയാറാവേണ്ടേ. എന്നിട്ട് വിലയിരുത്തിക്കൊണ്ടല്ലേ പറയേണ്ടത്. എന്നിട്ട് വീണിടത്ത് കിടന്ന് പിന്നേം വിദ്യ കാണിക്കാന്‍ നോക്കുക. അതാണല്ലോ സംഭവിക്കുന്നത്. അതിനെന്ത് ചെയ്യാന്‍ പറ്റുമെന്നും മുഖ്യമന്ത്രി പറഞ്ഞു.

 അന്വേഷണം ശരിയായ ദിശയിലാണെന്നാണ് ഇതേവരെ കിട്ടിയ ധാരണയെന്നും മുഖ്യമന്ത്രി പറഞ്ഞു.