ജിദ്ദ: സഊദിയില്‍ നിന്ന് ചികിത്സക്കായി നാട്ടിലേക്ക് പോവാന്‍ സാധിക്കാതെ നിയമക്കുരുക്കുകളില്‍ പെട്ട ഷാനവാസ് സുമനസ്സുകളുടെ സഹായത്താല്‍ നാട്ടിലേക്ക് മടങ്ങി.

ഷാനവാസിനെതിരെയുള്ള കേസ് സ്‌പോണ്‍സര്‍ പിന്‍വലിച്ചതോടെയാണ് യാത്രാവിലക്ക് നീങ്ങിയത്. ഇരു വൃക്കകളും തകരാറിലായി അസീര്‍ സെന്‍ട്രല്‍ ആശുപത്രിയില്‍ ചികിത്സയിലായിരുന്നു. തിരുവനന്തപുരം കിളിമാനൂര്‍ പള്ളിക്കല്‍ സ്വദേശിയാണ് ഷാനവാസ്. ഷാനവാസിന്റെ നിസ്സയാവസ്ഥ കഴിഞ്ഞ ദിവസം സുപ്രഭാതം റിപ്പോര്‍ട്ട് ചെയ്തിരുന്നു. ഇതേതുടര്‍ന്ന് അബഹയിലെ പൊതുപ്രവര്‍ത്തകര്‍ സഹായസമിതി രൂപീകരിച്ച് രംഗത്തിറങ്ങി. സ്‌പോണ്‍സറുമായും ആശുപത്രിയുമായും നിരന്തരം ബന്ധപ്പെട്ടാണ് നിയമ തടസ്സങ്ങള്‍ നീക്കിയത്.
ഷാനവാസിനുള്ള യാത്രാ രേഖകള്‍ ഒ.ഐ.സി.സി പ്രസിഡന്റ് അഷ്‌റഫ് കുറ്റിച്ചല്‍, ബഷീര്‍ മൂന്നിയൂര്‍, ബിജു നായര്‍ എന്നിവര്‍ കൈമാറി.