സുല്‍ത്താന്‍ ബത്തേരി: മൂന്ന് ലക്ഷം രൂപ വിലമതിക്കുന്ന 44 ഗ്രാം ഹെറോയിനുമായി യുവാവ് എക്‌സൈസിന്റെ പിടിയിലായി. കോഴിക്കോട് ചക്കുംകടവ് സ്വദേശി സലിം ആണ് അറസ്റ്റിലായത്. എക്‌സൈസ് ഇന്റലിജന്‍സ് വിഭാഗത്തിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയില്‍ സുല്‍ത്താന്‍ ബത്തേരി പുതിക്കാട് വച്ചാണ് ഇയാളെ പിടികൂടിയത്. നിരവധി നാര്‍ക്കോട്ടിക് കേസുകളിലെ പ്രതിയാണ് സലിം.
വയനാട് എക്‌സൈസ് ഇന്റലിജന്‍സും സുല്‍ത്താന്‍ ബത്തേരി എക്‌സൈസ് റെയിഞ്ച് പാര്‍ട്ടിയും ചേര്‍ന്നാണ് പ്രതിയെ പിടികൂടിയത്. എക്‌സൈസ് ഇന്‍സ്‌പെക്ടര്‍മാരായ വി.ആര്‍ ജനാര്‍ദ്ദനന്‍, എം.കെ സുനില്‍, അസി. എക്‌സൈസ് ഇന്‍സ്‌പെക്ടര്‍ വി.കെ മണികണ്ഠന്‍, പ്രിവന്റീവ് ഓഫിസര്‍മാരായ വി.ആര്‍ ബാബുരാജ് തുടങ്ങിയവര്‍ റെയ്ഡില്‍ പങ്കെടുത്തു.