മാനന്തവാടി: കെ.എസ്.ആര്‍.ടി.സി ബസിലെ ഡ്രൈവര്‍ കം കണ്ടക്ടറുടെ ബാഗില്‍നിന്നു മൂന്നുകുപ്പി വിദേശമദ്യം പിടികൂടി. പൊന്നാനി കെ.എസ്.ആര്‍.ടി.സി ഡിപ്പോയിലെ ജീവനക്കാരന്‍ പി. ശ്രീജിത്തിന്റെ ബാഗില്‍നിന്നാണ് കെ.എസ്.ആര്‍.ടി.സി വിജിലന്‍സ് വിഭാഗം മദ്യം പിടികൂടിയത്.

വ്യാഴാഴ്ച രാത്രി 12.30നാണ് സംഭവം. ബംഗളുരുവില്‍നിന്നു പൊന്നാനിയിലേക്കു വരുന്ന സൂപ്പര്‍ ഡീലക്‌സ് ബസില്‍ പരിശോധനയ്ക്കായി കാട്ടിക്കുളത്തുവച്ച് വിജിലന്‍സ് സംഘം കയറുകയായിരുന്നു. ശ്രീജിത്തിന്റെ ബാഗ് പരിശോധിച്ചപ്പോഴാണ് കെ.എസ്.ആര്‍.ടി.സി വിജിലന്‍സ് വിഭാഗത്തിലെ ആയങ്കി റസാഖ്, എ. പ്രകാശ് എന്നിവരടങ്ങുന്ന സംഘം മൂന്നു കുപ്പി മദ്യം കണ്ടെടുത്തത്.