കണ്ണൂര്‍: സംസ്ഥാന ചരിത്രത്തിലാദ്യമായി യു.എസ്.എസ് സ്‌കോളര്‍ഷിപ്പ് ഇതരസംസ്ഥാന തൊഴിലാളിയുടെ മകള്‍ക്ക്. കണ്ണൂര്‍ നോര്‍ത്ത് സബ് ജില്ലയില്‍ എസ്.എന്‍ പാര്‍ക്കിനടുത്തെ ദേവത്താര്‍ക്കണ്ടി യു.പി സ്‌കൂളിലെ രാജസ്ഥാന്‍കാരി സുബ്രജോതി എന്ന വിദ്യാര്‍ഥിയാണ് യു.എസ്.എസിന് അര്‍ഹയായത്.
പത്തു വര്‍ഷത്തിലധികമായി സുബ്രജ്യോതിയുടെ കുടുംബം കണ്ണൂരില്‍ താമസമാണ്. ഉന്തുവണ്ടിയില്‍ പാനിപ്പൂരി വില്‍പ്പന നടത്തുന്ന സുരേഷ് റാവത്തിന്റെയും സംഗീതയുടെയും മകളാണ് സുബ്രജോതി. രണ്ടാം തരം മുതലാണ് സുബ്രജോതി ദേവത്താര്‍ക്കണ്ടി യു.പി സ്‌കൂളില്‍ പഠിതാവായത്. സുബ്രജ്യോതിയുടെ പഠന മികവ് മനസിലാക്കിയ അധ്യാപകരാണ് എല്ലാ സഹായവും നല്‍കുന്നത്. പാഠ്യ പ്രവര്‍ത്തനത്തിലെന്ന പോലെ പാഠ്യേതര പ്രവര്‍ത്തനത്തിലും ജോതി സ്‌കൂളില്‍ മുന്‍പന്തിയിലാണ്. സഹോദരന്‍ ആകാശ് ഇതേ സ്‌കൂളില്‍ അഞ്ചാംതരം വിദ്യാര്‍ഥിയാണ്.