പാപ്പിനിശ്ശേരി: മോദിയുടെ ദുര്‍ഭരണത്തിനെതിരേ കഴിഞ്ഞ അഞ്ചുവര്‍ഷവും ശക്തമായ പ്രതിഷേധമോ സമരമോ നടത്താത്ത സി.പി.എം തെരഞ്ഞെടുപ്പ് സമയത്ത് മാത്രം സംഘ്പരിവാറിനെതിരേ പ്രസംഗിക്കുന്നതു വോട്ട് തട്ടാനുള്ള തന്ത്രമാണെന്നു വി.ടി ബല്‍റാം എം.എല്‍.എ. പാപ്പിനിശ്ശേരിയില്‍ യു.ഡി.എഫിന്റെ തെരഞ്ഞെടുപ്പ് റാലി ഉദ്ഘാടനം ചെയ്യുകയായിരുന്നു അേേദ്ദഹം. എന്നാല്‍ മന്‍മോഹന്‍ സിങ്ങിനെതിരേ നിരവധി സമരം സംഘടിപ്പിച്ചവരാണ് സി.പി.എമ്മുകാര്‍. ഇതു ബി.ജെ.പിയുമായി ഒത്തുകളി നടത്തുന്നതിന്റെ തെളിവാണ്. കേരളത്തില്‍ ഒരുനയവും കേരളം വിട്ടാല്‍ മറ്റൊരു നയവും സ്വീകരിക്കുന്ന പാര്‍ട്ടിയാണു സി.പി.എം. അവര്‍ നയമില്ലാത്ത ഒരു പ്രാദേശിക പാര്‍ട്ടിയായി അധഃപതിച്ചതായും ബല്‍റാം കുറ്റപ്പെടുത്തി.
സി.പി റഷീദ് അധ്യക്ഷനായി. അബ്ദുല്‍കരീം ചേലേരി, പി. ചന്ദ്രന്‍, കെ. ബാലകൃഷ്ണന്‍, ടി. ജയകൃഷ്ണന്‍, മാണിക്കര ഗോവിന്ദന്‍, എം.സി ദിനേശന്‍, ഒ.കെ മൊയ്തു, കെ.പി ഖാദര്‍കുട്ടി, എം. അബ്ദുറഹ്മാന്‍, സോഫിയാ വര്‍ഗീസ്, ഷീബാ ജോയ്, എം. നാസില സംസാരിച്ചു. കെ. പ്രമോദ്, ബിജു ഉമ്മര്‍, ടി.കെ അജിത്ത് എന്നിവര്‍ റാലിക്ക് നേതൃത്വം നല്‍കി. പാപ്പിനിശ്ശേരി പഞ്ചായത്ത് യു.ഡി.എഫ് കമ്മിറ്റിയുടെ നേതൃത്വത്തില്‍ കാട്ടിലെ പള്ളിക്കു സമീപത്തു നിന്നാരംഭിച്ച തെരഞ്ഞെടുപ്പ് റാലി കരിക്കിന്‍കുളത്ത് സമാപിച്ചു.