പീരുമേട്: ഒന്നരക്കിലോ കഞ്ചാവ് കടത്തികൊണ്ട് വന്ന കോട്ടയം ഇരവിമംഗലം കാരിവേലിപ്പറമ്പില്‍ വീട്ടില്‍ രതിന്‍(24), നിരപ്പേല്‍ വീട്ടില്‍ അഭിജിത്ത്(20) എന്നിവരെ വണ്ടിപ്പെരിയാര്‍ എക്‌സൈസ് സംഘം പിടികൂടി. ശനിയാഴ്ച രാത്രി പതിനൊന്ന് മണിയോട് കൂടി കുമളിയില്‍ വച്ചാണ് പ്രതികളെ അറസ്റ്റ് ചെയ്തത്.
തമിഴ്‌നാട് കമ്പം സ്വദേശിയില്‍ നിന്നും കുമളി ഗ്രേസ് തിയേറ്ററിന്റെ പരിസരത്ത് വച്ച് കഞ്ചാവ് വാങ്ങി ബസ് സ്റ്റാന്‍ഡിലേയ്ക്ക് വരുന്ന വഴിയാണ് ഇവര്‍ പിടിക്കപ്പെട്ടത്. കഞ്ചാവ് തമിഴ്‌നാട് സ്വദേശിയായ ഒരാള്‍ കുമളിയില്‍ എത്തിച്ച് നല്‍കുകയായിരുന്നു എന്നും 15000 രൂപാ വിലയായി നല്‍കിയെന്നും പ്രതികള്‍ മൊഴി നല്‍കിയിട്ടുണ്ട്. ഒന്നരക്കിലോ കഞ്ചാവ് പ്ലാസ്റ്റിക്ക് കവറിലാക്കി കെട്ടി തോള്‍ ബാഗിലാക്കി കൊണ്ട്‌വരികയായിരുന്നു. കോളജ് വിദ്യാര്‍ഥികള്‍ക്ക് കഞ്ചാവ് നല്‍കുന്ന സംഘത്തിലെ പ്രധാന കണ്ണിയായ കോട്ടയത്തെ ഒരു കോളജ് വിദ്യാര്‍ഥിക്ക്‌വേണ്ടിയാണ് പ്രതികള്‍ കഞ്ചാവ് കടത്തികൊണ്ട് വന്നത്. ഇയാള്‍ക്ക്‌വേണ്ടിയുളള അന്വേഷണം ആരംഭിച്ചതായി എക്‌സൈസ് ഉദ്യോഗസ്ഥര്‍ പറഞ്ഞു. എക്‌സൈസ് കമ്മിഷണറുടെ നിര്‍ദ്ദേശപ്രകാരം വരും ദിവസങ്ങളില്‍ പരിശോധന കൂടുതല്‍ കര്‍ശനമാക്കുമെന്ന് എക്‌സൈസ് ഉദ്യോഗസ്ഥര്‍ അറിയിച്ചു.
വണ്ടിപ്പെരിയാര്‍ എക്‌സൈസ് ഇന്‍സ്‌പെക്ടര്‍ സുനില്‍രാജ് സികെ, പ്രിവന്റീവ് ഓഫീസര്‍ സേവ്യര്‍ പി. ഡി, സിവില്‍ എക്‌സൈസ് ഓഫീസര്‍മാരായ രാജ്കുമാര്‍ ബി., രവി വി.,അനീഷ് ടി. എ. എന്നിവര്‍ ചേര്‍ന്നാണ് പ്രതികളെ പിടികൂടിയത്. പ്രതികളെ പീരുമേട് ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി റിമാന്‍ഡ് ചെയ്തു.