കുണ്ടറ: തുടര്‍ച്ചയായി പെയ്യുന്ന മഴയില്‍ കുണ്ടറ മണ്ഡലത്തിലെ വിവിധ പ്രദേശങ്ങളിലെ റോഡുകളില്‍ വെള്ളം കെട്ടിക്കിടക്കുന്നു. ഇതോടൊപ്പം കുന്നുകൂടിയ മാലിന്യങ്ങള്‍ ഒഴുകി പരക്കുകയും ചെയ്യുന്നു.

മഴവെള്ളത്തില്‍ നിന്നു പകര്‍ച്ചവ്യാധികള്‍ പടരുമ്പോഴും മാലിന്യം നീക്കുന്നതില്‍ തദ്ദേശസ്വയംഭരണ സ്ഥാപനങ്ങള്‍ക്ക് അലസതയാണ്. ആരോഗ്യവകുപ്പ് അധികൃതര്‍ തുടര്‍ച്ചയായി ബോധവത്കരണവും കൊതുകുനശീകരണ പ്രവര്‍ത്തനവുമായി രംഗത്തുണ്ടെങ്കിലും നഗരത്തിലെ ഇടറോഡുകളുടെ വശങ്ങളില്‍ കുന്നുകൂടുന്ന മാലിന്യത്തിന് കുറവില്ല. മഴയില്‍ ചീഞ്ഞളിയുന്ന മാലിന്യങ്ങള്‍ ദുര്‍ഗന്ധം പരത്തുന്നു.
നഗരപരിസരത്തുള്ള ഇടറോഡുകള്‍, കൊല്ലം-ചെങ്കോട്ട ദേശീയപാത, കൊട്ടിയം-കുണ്ടറ റോഡിന്റെ വശങ്ങള്‍, ചെറിയ റോഡുകള്‍ എന്നിവിടങ്ങളില്‍ മാലിന്യനിക്ഷേപം വ്യാപകമാണ്. അനധികൃതമായി പ്രവര്‍ത്തിക്കുന്ന കശാപ്പുശാലകള്‍, ഇറച്ചി-കോഴിക്കടകള്‍, ഹോട്ടലുകള്‍ എന്നിവിടങ്ങളില്‍ നിന്നുള്ള മാലിന്യങ്ങളാണ് ഏറെയും. ആളൊഴിഞ്ഞ പുരയിടങ്ങളിലും വയലുകളിലും ഇവ തള്ളുന്നതിനെതിരെ നടപടികള്‍ സ്വീകരിക്കാനോ മാലിന്യ സംസ്‌കരണ യൂനിറ്റുകള്‍ സ്ഥാപിക്കാനോ ബന്ധപ്പെട്ടവര്‍ താല്‍പ്പര്യം കാട്ടുന്നില്ലെന്ന് പരാതിഉയരുന്നു. കൊല്ലം-തേനി ദേശീയപാതയില്‍ വെള്ളിമണ്‍ മുതല്‍ പേരയം വരെ രാത്രിയുണ്ടാകുന്ന ഇരുചക്ര വാഹനാപകടങ്ങളില്‍ കൂടുതലും മാലിന്യം തിന്നാന്‍ വരുന്ന തെരുവുനായകള്‍ കുറുകെ ചാടുന്നത് മൂലമാണ്.
കടകളില്‍നിന്ന് ആഹാരാവശിഷ്ടങ്ങളും മത്സ്യമാംസങ്ങളുടെ അവശിഷ്ടങ്ങളും ഉള്‍പ്പെടെ പൊതുനിരത്തുകളിലും ആളൊഴിഞ്ഞ പുരയിടങ്ങളിലും വയലുകളിലും വലിച്ചെറിയുകയാണ്. മാലിന്യം പൊതുസ്ഥലത്ത് തള്ളുന്നവരെ കണ്ടെത്താന്‍ കാമറ സ്ഥാപിക്കണമെന്നാണ് കാലങ്ങളായുള്ള ആവശ്യം.