കണ്ണൂര്‍: സര്‍ക്കാര്‍ തൊഴിലുകള്‍ക്കായി കാത്തിരിക്കുന്നവര്‍ക്കു സന്തോഷവാര്‍ത്തയുമായി സംസ്ഥാന തൊഴില്‍ വകുപ്പ്. എംപ്ലോയ്‌മെന്റ് എക്‌സ്‌ചേഞ്ചില്‍ രജിസ്റ്റര്‍ ചെയ്യുന്ന യുവതീ-യുവാക്കള്‍ക്ക് ഇനി നീണ്ടക്യൂവില്‍ നില്‍ക്കേണ്ട.
പകരം വീട്ടില്‍നിന്നു ഒരൊറ്റ ക്ലിക്കില്‍ തങ്ങളുടെ യോഗ്യതയ്ക്കനുസരിച്ചുള്ള ജോലിക്കായുള്ള രജിസ്‌ട്രേഷന്‍ നടത്താം. രജിസ്‌ട്രേഷന്‍ പുതുക്കാനും കൂടുതല്‍ യോഗ്യതാ വിവരങ്ങള്‍ ചേര്‍ക്കുന്നതിനുമുള്ള ഓണ്‍ലൈന്‍ സംവിധാനം മെയ് ആദ്യവാരത്തോടെ ആരംഭിക്കും. ഇതോടെ സംസ്ഥാനത്തെ എംപ്ലോയ്‌മെന്റ് എക്‌സ്‌ചേഞ്ചുകളില്‍ അനുഭവപ്പെടുന്ന ശ്വാസംമുട്ടിക്കുന്ന ക്യൂ ഇല്ലാതാതാകും.
രജിസ്റ്റര്‍ ചെയ്യുന്ന ഒരോ ഉദ്യോഗാര്‍ഥിക്കും പി.എസ്.സി മാതൃകയില്‍ യൂസര്‍നെയിമും പാസ്‌വേഡും ഉപയോഗിച്ച് തന്റെ വിവരങ്ങള്‍ ചേര്‍ക്കാന്‍ ഓണ്‍ലൈന്‍ രജിസ്‌ട്രേഷനിലൂടെ സാധിക്കും. രാജ്യത്തെ ഏത് സംസ്ഥാനത്തുനിന്നും അവധി ദിനത്തിലുള്‍പ്പെടെ എംപ്ലോയ്‌മെന്റ് എക്‌സ്‌ചേഞ്ചില്‍ രജിസ്റ്റര്‍ ചെയ്യാന്‍ സാധിക്കും. രജിസ്‌ട്രേഷന്‍ ഓണ്‍ലൈനാകുന്നതോടെ സര്‍ക്കാര്‍ ജോലി ആഗ്രഹിച്ചിരിക്കുന്ന വികലാംഗരായവര്‍ക്കും ഈ സംവിധാനം ഏറെ പ്രയോജനകരമാകും.
എംപ്ലോയ്‌മെന്റ് എക്‌സ്‌ചേഞ്ചിന്റെ ഔദ്യോഗിക വെബ്‌സൈറ്റിലൂടെ ഓണ്‍ലൈനായി രജിസ്റ്റര്‍ചെയ്ത ശേഷം 60 ദിവസത്തിനകം ഓണ്‍ലൈന്‍ രജിസ്റ്റര്‍ ചെയ്തതിന്റെ പ്രിന്റ്ഔട്ടും രജിസ്റ്റര്‍ചെയ്യുന്ന സമയത്ത് ഉദ്യോഗാര്‍ഥിക്കു ലഭിക്കുന്ന നമ്പറും സഹിതം സമീപത്തെ എംപ്ലോയ്‌മെന്റ് എക്‌സ്‌ചേഞ്ചില്‍ എത്തി അനുമതി വാങ്ങുന്നതോടെയാണ് രജിസ്‌ട്രേഷന്‍ പൂര്‍ത്തിയാവുക.
ഓരോ കൂട്ടിച്ചേര്‍ക്കലും ഉദ്യോഗാര്‍ഥിക്ക് വീട്ടിലിരുന്നു തന്നെ നടത്താം. ംംം.ലാുഹീ്യാലിസേലൃമഹമ.ഴീ്.ശി എന്ന വെബ്‌സൈറ്റിലൂടെയാണ് രജിസ്‌ട്രേഷന്‍ നടത്തേണ്ടത്. തൊഴിലന്വേഷകര്‍ക്കുള്ള മൊബൈല്‍ ആപ്ലിക്കേഷനും നാഷനല്‍ ഇന്‍ഫോമാറ്റിക് സെന്ററിന്റെ നേതൃത്വത്തില്‍ ഒരുങ്ങുന്നുണ്ട്.