തിരുവനന്തപുരം: അര്‍ധ അതിവേഗ റെയില്‍പാത പദ്ധതി നടത്തിപ്പിന് ഏകപക്ഷീയമായ തീരുമാനവുമായി മുന്നോട്ടുപോയാല്‍ തിരിച്ചടിയായിരിക്കും ഫലമെന്ന് ചൂണ്ടിക്കാട്ടി കെ.പി.സി.സി മുന്‍ പ്രസിഡന്റ് വി.എം സുധീരന്‍ മുഖ്യമന്ത്രി പിണറായി വിജയന് കത്തുനല്‍കി. 

സില്‍വര്‍ലൈന്‍ പദ്ധതി നടത്തിപ്പിനെക്കുറിച്ച് വ്യാപകമായ ആശങ്കകളും ആക്ഷേപങ്ങളും പ്രതിഷേധങ്ങളും ഉയര്‍ന്നിട്ടുണ്ട്. വികസനപദ്ധതികള്‍ ജനഹിതം മാനിച്ചും സുതാര്യവും നിയമാനുസൃതവുമാകണം. പദ്ധതിയുടെ ഭാഗമായിട്ടുള്ള സ്ഥലം ഏറ്റെടുക്കല്‍, എത്ര പേരെയാണ് പദ്ധതി പ്രതികൂലമായി ബാധിക്കുക, പുനരധിവാസം, നഷ്ടപരിഹാരം തുടങ്ങിയ കാര്യങ്ങളെക്കുറിച്ച് വസ്തുനിഷ്ഠമായ പഠനവും പരിശോധനയും വേണം. 

നിയമാനുസൃതമായ പബ്ലിക് ഹിയറിങ് ജനങ്ങളെ മുന്‍കൂട്ടി അറിയിച്ചുകൊണ്ട് നടത്തണമെന്നും കത്തില്‍ ചൂണ്ടിക്കാട്ടി.