പാറ്റ്‌ന: ബിഹാറില്‍ മാവോയിസ്റ്റുകളുമായുള്ള ഏറ്റുമുട്ടലില്‍ എട്ട് സുരക്ഷാ ഉദ്യോഗസ്ഥര്‍ കൊല്ലപ്പെട്ടു. സൈനികരുടെ തിരിച്ചടിയില്‍ നാലു മാവോയിസ്റ്റുകളും കൊല്ലപ്പെട്ടിട്ടുണ്ട്. ബിഹാറിലെ ഗയ, ഔറംഗാബാദ് ജില്ലകളുടെ അതിര്‍ത്തി പ്രദേശമായ ദുമാരി നാല വനമേഖലയിലാണ് സംഭവം. ബിഹാറിന്റെ തലസ്ഥാനമായ പാറ്റ്‌നയില്‍ നിന്ന് 172 കിലോമീറ്റര്‍ ദൂരത്താണിത്.

സംഭവസ്ഥലത്ത് 17 ചെറു സ്‌ഫോടനങ്ങളുണ്ടായതാണ് റിപ്പോര്‍ട്ട്. നിരവധി സൈനികര്‍ക്ക് പരുക്കേറ്റതായും മരണസംഖ്യ ഉയരാന്‍ സാധ്യതയുള്ളതായും സൈനിക വൃത്തങ്ങള്‍ അറിയിച്ചു.

പരുക്കേറ്റ സൈനികരെ രക്ഷിക്കാനായി സംഭവസ്ഥലത്തേക്ക് ഹെലികോപ്റ്റര്‍ അയച്ചിട്ടുണ്ട്. എന്നാല്‍ മാവോയിസ്റ്റുകളുടെ ആക്രമണം തുടരുന്നതിനാല്‍ സംഭവസ്ഥലത്തേക്ക് ഹെലികോപ്റ്റര്‍ ഇറക്കാനാവുന്നില്ലെന്നും റിപ്പോര്‍ട്ടുണ്ട്.