കൊല്ലം: അഞ്ചലില്‍ മര്‍ദ്ദനമേറ്റ ഇതരസംസ്ഥാന തൊഴിലാളി മരിച്ചു. ബംഗാള്‍ സ്വദേശിയായ മണിക് റോയ്(32) ആണ് മരിച്ചത്. ഇയാള്‍ മരിച്ചത് തലയ്‌ക്കേറ്റ ക്ഷതത്തെത്തുടര്‍ന്നാണെന്നാണ് പോസ്റ്റ്‌മോര്‍ട്ടം റിപ്പോര്‍ട്ട്. മൂന്നാഴ്ച്ച മുന്‍പാണ് ബൈക്കിലെത്തിയ സംഘം മണിക് റോയിയെ ആക്രമിച്ചത്. കോഴിയെ മോഷ്ടിച്ചെന്നാരോപിച്ചാണ് മര്‍ദ്ദനം.

രക്തം വാര്‍ന്ന് കുഴഞ്ഞുവീണ റോയിയെ നാട്ടുകാര്‍ ആശുപത്രിയില്‍ പ്രവേശിപ്പിക്കുകയായിരുന്നു. പിന്നീട് ആശുപത്രി വിട്ട മണിക് ഏതാനും ദിവസം ജോലിയ്ക്ക് പോയിരുന്നു. പിന്നീട് വീണ്ടും കുഴഞ്ഞുവീണതോടെ ആശുപത്രിയില്‍ പ്രവേശിപ്പിക്കുകയായിരുന്നു. മരണത്തില്‍ ദുരൂഹതയുണ്ടെന്ന ബന്ധുക്കളുടെ ആരോപണത്തെത്തുടര്‍ന്നാണ് പോസ്റ്റ്‌മോര്‍ട്ടം നടത്തിയത്. തലയ്ക്കു ക്ഷതമേറ്റെങ്കിലും വിദഗ്ധ ചികിത്സ ലഭ്യമാകാത്തതാണു മരണകാരണമെന്ന റിപ്പോര്‍ട്ടും അതിനിടെ പുറത്തുവന്നു.

സംഭവത്തില്‍ കേസെടുത്ത അഞ്ചല്‍ പൊലിസ് ഒരാളെ അറസ്റ്റ് ചെയ്തു. ഇയാളുടെ വിവരങ്ങള്‍ പുറത്തുവിട്ടിട്ടില്ല. മറ്റൊരാളെ പൊലിസ് തിരയുകയാണ്. ഇയാള്‍ ഒളിവിലാണെന്നാണു സൂചന.