ഉരുവച്ചാല്‍: പനി ബാധിച്ച് കളമശ്ശേരി മെഡിക്കല്‍ കോളജില്‍ ചികിത്സയ്ക്കിടെ മരണപ്പെട്ട മെഡിക്കല്‍ വിദ്യാര്‍ഥിനി ഷംന തസ്‌നീമിന്റെ ശിവപുരത്തെ വീട് മുന്‍ മുഖ്യമന്ത്രി ഉമ്മന്‍ ചാണ്ടി സന്ദര്‍ശിച്ചു. അന്വേഷണം ശരിയായ രീതിയിലല്ല നടക്കുന്നതെന്നു ബന്ധുക്കള്‍ ഉമ്മന്‍ ചാണ്ടിയോട് പറഞ്ഞു.
കഴിഞ്ഞ ജൂലൈ 18നാണ് ഷംന ആശുപത്രിയില്‍ മരിച്ചത്. മരണം മറച്ചു വച്ച മെഡിക്കല്‍ കോളജ് ആശുപത്രി അധികൃതര്‍ ഷംനയെ രാജഗിരി ആശുപത്രിയിലേക്ക് മാറ്റി. ഇവിടെ എത്തിയപ്പോള്‍ തന്നെ ഷംന മരിച്ചിരുന്നുവെന്ന് പിതാവ് അബൂട്ടി ഉമ്മന്‍ ചാണ്ടിയോട് പറഞ്ഞു.
കുടുംബത്തിന് നീതി ലഭിക്കാനാവശ്യമായ നടപടികള്‍ തന്റെ ഭാഗത്തു നിന്നുണ്ടാകുമെന്ന് ഉമ്മന്‍ ചാണ്ടി ഉറപ്പുനല്‍കി. മുഖ്യമന്ത്രിയെ കണ്ട് ഉന്നതതല അന്വേഷണം നടത്തേണ്ട ആവശ്യകതയെ കുറിച്ച് സൂചിപ്പിക്കുമെന്ന് അദ്ദേഹം മാധ്യമ പ്രവര്‍ത്തകരോട് പറഞ്ഞു.
അഡ്വ. സണ്ണി ജോസഫ് എം.എല്‍.എ, ഡി.സി.സി പ്രസിഡന്റ് സതീശന്‍ പാച്ചേനി, വൈസ് പ്രസിഡന്റ ചന്ദ്രന്‍ തില്ലങ്കേരി, കെ.പി.സി.സി അംഗം എം.പി മുരളി, മാലൂര്‍ മണ്ഡലം പ്രസിഡന്റ് എ. ജയരാജ്, രാഗേഷ് തില്ലങ്കേരി, പി.എം ആബൂട്ടി തുടങ്ങിയവരും മുന്‍ മുഖ്യമന്ത്രിക്കൊപ്പമുണ്ടായിരുന്നു.