തിരുവനന്തപുരം: നിപാ വൈറസ് ബാധിച്ചവരെ ചികില്‍സിച്ച് രോഗം പിടിപ്പെട്ട് മരിച്ച നഴ്‌സ് ലിനിയുടെ ഭര്‍ത്താവിന് സര്‍ക്കാര്‍ ജോലി നല്‍കി. കോഴിക്കോട് ഡി.എം.ഒ ഓഫിസില്‍ എല്‍.ഡി ക്ലര്‍ക്കായാണ് നിയമനം. പേരാമ്പ്ര താലൂക്ക് ആശുപത്രിയില്‍ നിപാ ബാധയുള്ളവരെ ചികിത്സിക്കുന്നതിനിടയിലാണ് ലിനി മരണത്തിന് കീഴടങ്ങിയത്.
മനാമയില്‍ അക്കൗണ്ടന്റായി ജോലി ചെയ്യുന്ന സജീഷ് ലിനിക്ക് നിപാ സ്ഥിരീകരിച്ചതോടെയാണ് നാട്ടില്‍ എത്തിയത്. അഞ്ചുവയസും രണ്ടു വയസുമുള്ള രണ്ടുമക്കളാണ് ലിനിക്കും സജീഷിനുമുള്ളത്. രോഗം പകരുമെന്ന് ഡോക്ടര്‍മാരും ആരോഗ്യപ്രവര്‍ത്തകരും നിര്‍ദേശം നല്‍കിയതിനെ തുടര്‍ന്ന് ലിനിയുടെ മൃതദേഹം പോലും അവസാനമായി കാണാന്‍ സജീഷിന് കഴിഞ്ഞിരുന്നില്ല.