മലപ്പുറം: ജില്ലയില്‍ ഡിഫ്തീരിയ വീണ്ടും തിരിച്ചെത്തിയതോടെ പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കാന്‍ ആരോഗ്യവകുപ്പിന്റെ തീരുമാനം. ഡി.എം.ഒ ഡോ.സക്കീന വിളിച്ചു ചേര്‍ത്ത മിഷന്‍ മുക്തി യോഗത്തില്‍ ഇതിനായി കര്‍മ പദ്ധതി തയാറാക്കി. എന്റെ മലപ്പുറം, ആരോഗ്യമുള്ള മലപ്പുറം എന്ന ശീര്‍ഷകത്തില്‍ എല്ലാ തരം പകര്‍ച്ച വ്യാധികളെയും പ്രതിരോധിക്കുന്നതിന് കര്‍മ പദ്ധതി തയാറാക്കി ബഹുജന പങ്കാളിത്തത്തോടെ നടപ്പാക്കാനാണ് തീരുമാനം.
15ഓടെ പദ്ധതിക്ക് തുടക്കം കുറിക്കുന്നതിനുള്ള പ്രവര്‍ത്തനങ്ങള്‍ക്ക് നേതൃത്വം നല്‍കാന്‍ ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ ചെയര്‍മാനും ഡി.എ.ഒ ഡോ.സക്കീന വൈസ് ചെയര്‍പേഴ്‌സണായും, ആര്‍.സി.എച്ച് ഓഫിസര്‍ ഡോ.രേണുക, എന്‍.ആര്‍.എച്ച്.എം പ്രോഗ്രാം മാനേജര്‍ ഡോ.ഷിബുലാല്‍ എന്നിവര്‍ കണ്‍വീനര്‍മാരായും കമ്മിറ്റി രൂപീകരിച്ചു.
ഡോ. വിനൂപാണ് ജനറല്‍ കോഡിനേറ്റര്‍. ജില്ലയിലെ മെഡിക്കല്‍ കോളജിലെയും സ്വകാര്യ ആശുപത്രികളിലെയും ഡോക്ടര്‍മാരടക്കമുള്ളവര്‍ ഈ കമ്മിറ്റിയില്‍ അംഗങ്ങളുമാണ്. ഇതിന് പുറമെ നഗര പ്രദേശങ്ങളില്‍ ആരോഗ്യ പ്രതിരോധ പ്രവര്‍ത്തനങ്ങള്‍ ഊര്‍ജിതപ്പെടുത്തും. നഗര കേന്ദ്രങ്ങളില്‍ എന്‍.ആര്‍.എച്ച്.എം ആരംഭിച്ചിട്ടുള്ള പ്രാഥമിക ആരോഗ്യ കേന്ദ്രങ്ങളില്‍ 42 ഓളം ജെ.പി.എച്ച്.എന്‍മാരെ നിയമിച്ചിട്ടുണ്ട്.