അന്തിക്കാട്: ചെമ്മാപ്പിള്ളി പഴയ പോസ്റ്റ്ഓഫീസിന് വടക്കുവശം കഞ്ചാവ് സംഘത്തിന്റെ ആക്രമണത്തില്‍ യുവാവിന് ഗുരുതര പരിക്കേറ്റു. സാരമായ പരിക്കുകളോടെ ചെമ്മാപ്പിള്ളി കണാറ പ്രദിന്‍ (46) തൃശൂരിലെ സ്വകാര്യ ആശുപത്രിയില്‍ ചികിത്സയിലാണ്. ഞായറാഴ്ച വൈകുന്നേരം വീടിന് സമീപം കൂട്ടുകാരോടൊത്ത് സംസാരിച്ചുനില്‍ക്കുകയായിരുന്ന പ്രദിനെ ഗുണ്ടാസംഘം ആക്രമിക്കുകയായിരുന്നു. പെരിങ്ങോട്ടുകര നാലുംകൂടിയ സെന്റര്‍ കേന്ദ്രീകരിച്ച് പ്രവര്‍ത്തിക്കുന്ന മാഫിയ സംഘങ്ങളാണ് ആക്രമണം നടത്തിയതെന്ന് പറയപ്പെടുന്നു.
പ്രദേശത്ത് മയക്കുമരുന്ന് ഉപയോഗിക്കുന്നതിന് സംഘം ചേര്‍ന്ന് എത്തിയ ഇവര്‍ സമീപത്തുണ്ടായിരുന്ന പ്രദിനോടും കൂട്ടുകാരോടും തട്ടിക്കയറുകയും ഇവരെ മര്‍ദ്ദിച്ച് അവശരാക്കുകയുമായിരുന്നു. പൊലിസ് അന്വേഷണം ഊര്‍ജ്ജിതമാക്കി.പ്രതികളെന്ന് സംശയിക്കുന്നവരുടെ വീടുകളില്‍ പരിശോധന നടത്തി.