മലപ്പുറം: കാലിക്കറ്റ് സര്‍വകലാശാലയ്ക്കു കീഴിലുള്ള അഫിലിയേറ്റഡ് കോളജിലെ ബി.എ ഫോറിന്‍ ട്രേഡ് (ബി.എ.എഫ്.ടി) കോഴ്‌സില്‍ കൂട്ടത്തോല്‍വി. നിലവില്‍ അവസാന വര്‍ഷ പഠനം നടത്തുന്ന വിദ്യാര്‍ഥികളുടെ രണ്ടാം സെമസ്റ്റര്‍ ഫലത്തിലാണ് സമാന മാര്‍ക്കോടെ കൂട്ടത്തോല്‍വിയുണ്ടായത്.
സര്‍വകലാശാലയ്ക്കു കീഴിലുള്ള അഞ്ചു കോളജുകളിലാണ് ഈ കോഴ്‌സ് പഠിപ്പിക്കുന്നത്. ഇതില്‍ നാലെണ്ണം മലപ്പുറം ജില്ലയിലാണ്. തോറ്റവരില്‍ 60 ശതമാനത്തിലധികം പേര്‍ക്കും 11 മാര്‍ക്കാണ് ലഭിച്ചിരിക്കുന്നത്. മികച്ച രീതിയില്‍ പഠിക്കുന്നവര്‍ക്കുവരെ ഈ മാര്‍ക്കാണ് ലഭിച്ചത്. ഇതേ കോഴ്‌സ് പഠിപ്പിക്കുന്ന കോളജുകള്‍ പരസ്പരം ബന്ധപ്പെട്ടപ്പോഴാണ് കൂട്ടത്തോല്‍വിയുണ്ടായ റിസള്‍ട്ടിലെ കൗതുകം വെളിച്ചത്തായത്.
ജയിച്ചവര്‍ക്കുതന്നെ വളരെ കുറഞ്ഞ മാര്‍ക്കാണ് ലഭിച്ചിട്ടുള്ളതെന്നതും സംശയത്തിന് ആക്കംകൂട്ടുന്നു. ഇക്കണോമിക്‌സ് വിദ്യാര്‍ഥികള്‍ക്കുള്ള കോംപ്ലിമെന്ററി പേപ്പറായാണ് കോ ഓപറേഷന്‍ പഠിപ്പിക്കുന്നത്.
എന്നാല്‍, മൂല്യനിര്‍ണയ ക്യാംപുകളില്‍ പലപ്പോഴും കോംപ്ലിമെന്ററി പേപ്പറുകള്‍ നോക്കാനാളില്ലാത്ത അവസ്ഥയാണ്.
ഇത്തരത്തില്‍ സര്‍വകലാശാലയിലേക്കു തിരിച്ച് അയക്കുന്ന പേപ്പറുകള്‍ ഏതുവിധേനയും മൂല്യനിര്‍ണയം നടത്തി ഫലപ്രഖ്യാപനം നടത്താന്‍ സര്‍വകലാശാലയും നിര്‍ബന്ധിതരാകുന്നു.
ഇതാണ് പലപ്പോഴും കൂട്ടത്തോല്‍വിക്ക് ഇടയാകുന്നത്. വീണ്ടും പരീക്ഷ എഴുതണോ അതോ പുനര്‍മൂല്യനിര്‍ണയത്തിന് അയക്കണോ എന്ന ആശങ്കയിലാണ് വിദ്യാര്‍ഥികള്‍.