ന്യൂഡല്‍ഹി: കരിപ്പൂര്‍ വിമാനത്താവളത്തിലെ അപകടത്തെക്കുറിച്ച് സിവില്‍ ഏവിയേഷന്‍ നടത്തുന്ന അന്വേഷണത്തില്‍ ബ്ലാക്ക് ബോക്‌സില്‍ നിന്ന് ലഭിക്കുന്ന വിവരങ്ങള്‍ നിര്‍ണായകമാവും. വിമാനത്തിലെ ബ്ലാക്ക് ബോക്‌സുകള്‍ കണ്ടെത്തിയ കാര്യം വ്യോമയാനമന്ത്രി ഹര്‍ദീപ് സിങ് പുരി സ്ഥിരീകരിച്ചിട്ടുണ്ട്. 

വിമാനത്തിലെ പൈലറ്റുമാര്‍ കണ്‍ട്രോള്‍ റൂമുമായി നടത്തിയ ആശയവിനിമയങ്ങളും കോക്ക് പിറ്റിലെ എന്‍ജിന്‍ ശബ്ദവും സംസാരവുമെല്ലാം ബ്ലാക്ക് ബോക്‌സില്‍ റെക്കോര്‍ഡ് ചെയ്യപ്പെട്ടിട്ടുണ്ടാകും. ഓറഞ്ച് നിറത്തിലുള്ള പെട്ടിയായിരിക്കും ബ്ലാക്ക് ബോക്‌സ്. അതിനുള്ളിലുള്ള മെമ്മറി ചിപ്പിലായിരിക്കും വിവരങ്ങള്‍ സ്‌റ്റോര്‍ ചെയ്യപ്പെടുക. രണ്ടു ബ്ലാക്ക് ബോക്‌സുകളാണ് ഒരു വിമാനത്തിലുണ്ടാകുക. കോക്ക് പിറ്റ് വോയ്‌സ് റെക്കോര്‍ഡര്‍ വഴി കോക്ക് പിറ്റിലെ സംസാരവും ഫ്‌ളൈറ്റ് ഡാറ്റ റെക്കോര്‍ഡര്‍ വഴി മറ്റു വിവരങ്ങളും ഇതിലേക്ക് ശേഖരിക്കപ്പെടും. വിമാനം പറക്കുന്ന ഉയരം, വേഗം, ദിശ, ഓട്ടോ പൈലറ്റ് സ്റ്റാറ്റസ് തുടങ്ങി 80 വിവരങ്ങളായിരിക്കും ഫ്‌ളൈറ്റ് ഡാറ്റ റെക്കോര്‍ഡിലൂടെ ശേഖരിക്കപ്പെടുക. വിമാനാപകടങ്ങളില്‍ തകരാത്ത വിധത്തില്‍ ഇരുമ്പുകൊണ്ടോ ടൈറ്റാനിയം കൊണ്ടോ ആയിരിക്കും ബ്ലാക്ക് ബോക്‌സ് നിര്‍മിക്കുക. വിമാനത്തിന്റെ പിന്നിലായിരിക്കും ബ്ലാക്ക് ബോക്‌സ് ഘടിപ്പിക്കുക. വിമാനം വീഴുകയാണെങ്കില്‍ ആഘാതം കുറയാന്‍ സാധ്യതയുള്ള ഭാഗം പിന്നിലായതുകൊണ്ടാണിത്. 

വെള്ളത്തില്‍ വീണാല്‍പ്പോലും 30 ദിവസം അത് സിഗ്നലുകള്‍ പുറപ്പെടുവിക്കും.