പാലക്കാട്:    പകര്‍ച്ചവ്യാധികള്‍ നിയന്ത്രിക്കുന്നതിനും പ്രതിരോധ പ്രവര്‍ത്തനങ്ങള്‍ ഊര്‍ജിതപ്പെടുത്തുന്നതിനുമുള്ള പ്രത്യേക കാംപെയ്‌നായ 'ഹെല്‍ത്തി കേരള'യുടെ ഭാഗമായി ജില്ലയിലുടനീളം തോട്ടങ്ങള്‍, സ്ഥാപനങ്ങള്‍, വീടുകള്‍ എന്നിവിടങ്ങളില്‍ കൊതുകിന്റെ ഉറവിട നശീകരണവും നിര്‍മാര്‍ജന പ്രവര്‍ത്തനങ്ങളും നടത്തി. പകര്‍ച്ചവ്യാധികള്‍ വരാനുള്ള സാഹചര്യം സൃഷ്ടിച്ചവര്‍ക്ക് ആരോഗ്യ വിദ്യാഭ്യാസം നല്‍കുകയും ഗുരുതരമായ വിഴ്ച വരുത്തിയവര്‍ക്ക് പൊതുജനാരോഗ്യ നിയമപ്രകാരം നോട്ടീസ് നല്‍കുകയും ചെയ്തു.
5946 വീടുകള്‍ സന്ദര്‍ശിച്ചതില്‍ 31 വീടുകള്‍ക്കും 151 തോട്ടങ്ങളില്‍ 11 തോട്ട ഉടമകള്‍ക്കെതിരെയും 546 സ്ഥാപനങ്ങളില്‍ 32 സ്ഥാപനങ്ങള്‍ക്കും  പൊതുജനാരോഗ്യ നിയമപ്രകാരം നോട്ടീസ് നല്‍കി.
നോട്ടീസ് നല്‍കിയവരോട് നിശ്ചിത സമയത്തിനകം പ്രശ്‌നപരിഹാരം നടത്തി റിപ്പോര്‍ട്ട് ചെയ്യണമെന്നും അല്ലാത്ത പക്ഷം കര്‍ശന നടപടികള്‍ സ്വീകരിക്കുമെന്നും ജില്ലാ മെഡിക്കല്‍ ഓഫീസര്‍ അറിയിച്ചു.
    ജില്ലയിലുടനീളം 154 സംഘങ്ങളായി  പരിശോധന നടത്തിയതില്‍ 445 ആരോഗ്യ വിഭാഗം ഉദ്യോഗസ്ഥന്‍മാര്‍ പങ്കെടുത്തു. മെഡിക്കല്‍ ഓഫീസര്‍മാര്‍.
ഹെല്‍ത്ത് ഇന്‍സ്‌പെക്ടര്‍മാര്‍, ഹെല്‍ത്ത് സൂപ്പര്‍വൈസര്‍മാര്‍, ജൂനിയര്‍ പബ്ലിക്  ഹെല്‍ത്ത് നഴ്‌സുമാര്‍ , ജൂനിയര്‍ പബ്ലിക് ഹെല്‍ത്ത് ഇന്‍സ്‌പെക്ടര്‍മാര്‍ എന്നിവരാണ് സംഘങ്ങളായി പരിശോധന നടത്തിയത്. കൂടാതെ ഡെപ്യൂട്ടി ജില്ലാ മെഡിക്കല്‍ ഓഫീസറും ജില്ലാ സര്‍വെലന്‍സ് ഓഫീസറുമായ ഡോ: നാസറിന്റെ നേതൃത്വത്തിലുള്ള ജില്ലാതല സംഘം നഗരസഭാ പ്രദേശങ്ങളിലും ഡെങ്കിപ്പനി കൂടുതലായി റിപ്പോര്‍ട്ട് ചെയ്ത സ്ഥലങ്ങളിലും പരിശോധന നടത്തി.