കൊടുങ്ങല്ലൂര്‍: മലവെള്ളപ്പാച്ചിലില്‍ ആനയുടെ ജഡം പുഴയിലൂടെ ഒഴുകിയെത്തി. പതിനഞ്ച് വയസ്സോളം പ്രായമുള്ള കുട്ടിക്കൊമ്പന്റെ അഞ്ച് ദിവസത്തോളം പഴക്കമുള്ള ജഡമാണ് കാഞ്ഞിരപ്പുഴയില്‍ ഒഴുകിയെത്തിയത്.

 നേര്യമംഗലം വനത്തില്‍ നിന്നും ഒഴുകിയെത്തിയതാണ് ആനയെന്നാണ് സൂചന. കാലടി പാലത്തിനടുത്ത്  ആനയുടെ ജഡം കണ്ടെത്തിയെങ്കിലും കരയ്ക്കടുപ്പിക്കാനായില്ല. പിന്നീട്

ശക്തമായ ഒഴുക്കില്‍ ജഡം കാഞ്ഞിരപ്പുഴ വരെയെത്തുകയായിരുന്നു. കോട്ടപ്പുറം കോട്ടക്കടവില്‍ വച്ച്

പരിയാരം റെയ്ഞ്ച് ഓഫിസര്‍ ടി.എസ് മാത്യു, ഡെപ്യൂട്ടി റെയ്ഞ്ച് ഓഫിസര്‍ സുധീഷ് എന്നിവരുടെ നേതൃത്വത്തില്‍

വടം കെട്ടി തടഞ്ഞ ജഡം പിന്നീട് കോട്ടപ്പുറം പാലത്തിനടുത്ത് എത്തിച്ച് ക്രെയിന്‍ ഉപയോഗിച്ച് കരയ്ക്കു കയറ്റി.  ചാലക്കുടി പരിയാരം കാട്ടിലെത്തിച്ച ജഡം ഇന്ന്  പോസ്റ്റ്‌മോര്‍ട്ടത്തിന് ശേഷം സംസ്‌ക്കരിക്കും.