വിജയവാഡ:  ആന്ധ്രപ്രദേശില്‍ കൊവിഡ് കെയര്‍ സെന്ററിലുണ്ടായ വന്‍ തീപിടിത്തത്തില്‍ 10 പേര്‍ മരിച്ചു.

വിജയവാഡയില്‍ കൊവിഡ് ചികിത്സാ കേന്ദ്രമാക്കിമാറ്റിയ ഹോട്ടലില്‍ ഇന്നലെ രാവിലെയാണ് സംഭവം. 

  ഷോട്ട് സര്‍ക്യൂട്ടാണ് തീപിടിത്തത്തിന് കാരണമെന്നാണ് വിലയിരുത്തല്‍. സംഭവസമയം 30 ഓളം രോഗികളും 10 ആരോഗ്യപ്രവര്‍ത്തകരുമായിരുന്നു ഇവിടെ ഉണ്ടായിരുന്നത്. ഹോട്ടലിന്റെ താഴെ നിലയിലുണ്ടായ തീപ്പിടുത്തം രണ്ടാം നിലിലേക്കും വ്യാപിക്കുകയായിരുന്നു. അതേസമയം ഹോട്ടല്‍ ഫയര്‍ആന്റ് റെസ്‌ക്യൂ വിഭാഗത്തിന്റെ സുരക്ഷാ മാദനദണ്ഡങ്ങള്‍ പാലിച്ചിരുന്നില്ലെന്നും റിപ്പോര്‍ട്ടുണ്ട്. സംഭവം ഞെട്ടിപ്പിക്കുന്നതാണെന്ന് അന്ധ്ര മുഖ്യമന്ത്രി ജഗന്‍മോഹന്‍ റെഡ്ഡി പ്രതികരിച്ചു. തീപ്പിടുത്തം സംബന്ധിച്ച് വിശദമായ റിപ്പോര്‍ട്ട് സമര്‍പ്പിക്കാനും അദ്ദേഹം ഉദ്യോഗസ്ഥരോട് ആവശ്യപ്പെട്ടു. ഇരകളുടെ കുടുംബങ്ങള്‍ക്ക് 50 ലക്ഷം സഹായധനം പ്രഖ്യാപിച്ചു. 

അന്വേഷണം ആരംഭിച്ചതായി ജില്ലാകലക്ടര്‍ മുഹമ്മദ് ഇംതിയാസ് പറഞ്ഞു.

സംഭവത്തില്‍ പ്രധാനമന്ത്രി നരേന്ദ്രമോദി, രാഷ്ട്രപതി രാംനാഥ് കോവിന്ദ് എന്നിവര്‍ അനുശോചിച്ചു. രാജ്യത്ത് സമാനമായ രണ്ടാമത്തെ അപകടമാണിത്. കഴിഞ്ഞ ചൊവ്വാഴ്ച ഗുജറാത്തില്‍ കൊവിഡ് ചികിത്സാ കേന്ദ്രത്തിന് തീപ്പിടിച്ച് എട്ടു രോഗികള്‍ മരിച്ചിരുന്നു. 

ആന്ധ്രപ്രദേശില്‍ ഇന്നലെ 10080 പുതിയ കൊവിഡ് കേസുകളാണ് റിപ്പോര്‍ട്ട ് ചെയ്യപ്പെട്ടത്. സംസ്ഥാനത്ത് ഇതുവരെ കൊവിഡ് ബാധിച്ചവരുടെ എണ്ണം 2,17,040 ആയി ഉയര്‍ന്നു