മണ്ണഞ്ചേരി: കൈയേറ്റക്കാരുടെ കുരിശിന്റെ പേരില്‍ ഭരണാധികാരികള്‍ വ്യാകുലപ്പെടേണ്ടെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. പാതിരപ്പള്ളിയില്‍ സി.പി.ഐ ലോക്കല്‍ കമ്മിറ്റി ഓഫിസായ ടി.വി തോമസ് സ്മാരകമന്ദിരം ഉദ്ഘാടനംചെയ്ത് സംസാരിക്കുകയായിരുന്നു അദ്ദേഹം. സ്ഥലവും കാലവും നോക്കി കൈയേറ്റക്കാര്‍ മതചിഹ്നങ്ങളിലും മാറ്റംവരുത്തും. ഇപ്പോള്‍ കുരിശുകണ്ടതിന്റെ വിളിപ്പാടകലെ നാളെ ത്രിശൂലവും പ്രത്യക്ഷപ്പെട്ടേക്കാം.
കൈയേറ്റം നടത്തിയാല്‍ ഭൂമി നിയമാനുസൃതം തിരിച്ചുപിടിക്കല്‍ മാത്രം പോര. നിയമനടപടിയും സ്വീകരിക്കണം. ഇതിനായി ഹൈക്കോടതിയില്‍ പ്രത്യേക ബെഞ്ച് രൂപീകരിച്ച് വിചാരണ വേഗത്തിലാക്കണമെന്നാണ് സി.പി.ഐ സംസ്ഥാന കൗണ്‍സില്‍ തീരുമാനം. പ്രസിഡന്റ് തെരഞ്ഞെടുപ്പില്‍ ജനാധിപത്യ മതേതരശക്തികളുടെ ഐക്യനിര വിപുലമാക്കുകയാണ് ലക്ഷ്യമെന്നും കാനം വ്യക്തമാക്കി.