കോഴിക്കോട്: ഈ വര്‍ഷത്തെ സ്വാതന്ത്ര്യ ദിനത്തില്‍ എസ് കെ എസ് എസ് എഫ് സംസ്ഥാന വ്യാപകമായി ശാഖാതലങ്ങളില്‍ ഫ്രീഡം സ്‌ക്വയര്‍ നടത്തും. കഴിഞ്ഞ വര്‍ഷങ്ങളില്‍ മേഖലാ തലത്തില്‍ നടത്തിവന്നിരുന്ന പരിപാടി ഈ വര്‍ഷം കോവിഡ് പ്രോട്ടോകോള്‍ പാലിച്ച് കൊണ്ട് ലളിതമായി സംഘടിപ്പിക്കും. സ്വാതന്ത്ര്യം ; പോരാട്ടം അവസാനിക്കുന്നില്ല എന്ന മുദ്രാവാക്യവുമായി സ്വാതന്ത്ര്യ ദിന സായാഹ്നത്തിലാണ് പരിപാടി നടക്കുക. പ്രതിജ്ഞ, പ്രമേയ പ്രഭാഷണം എന്നിവ നടക്കും. കണ്ടെയ്ന്‍മെന്റ് സോണുകളില്‍ ഓണ്‍ലൈന്‍ മുഖേനയാവും പരിപാടി നടക്കുക.
സ്വാതന്ത്ര്യത്തിന്റെ ഏഴ് പതിറ്റാണ്ട് പിന്നിടുമ്പോള്‍ രാജ്യം കടുത്ത വെല്ലുവിളിയാണ് നേരിട്ടു കൊണ്ടിരിക്കുന്നതെന്നും അതിനെ മറികടക്കാന്‍ ഭരണഘടനാ മൂല്യങ്ങളും രാഷ്ട്രത്തിന്റെ ഐക്യവും സംരക്ഷിക്കാന്‍ കഴിയണമെന്നും എസ് കെ എസ് എസ് എഫ് സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങളും ജനറല്‍ സെക്രട്ടറി സത്താര്‍ പന്തലൂരും പറഞ്ഞു. ഫ്രീഡം സ്‌ക്വയര്‍ വന്‍ വിജയമാക്കാന്‍ സംഘടനാ പ്രവര്‍ത്തകര്‍ മുന്നിട്ടിറങ്ങണമെന്നും അവര്‍ അഭ്യര്‍ത്ഥിച്ചു.